AGMK – “Metallurg” jamoalari o‘rtasidagi uchrashuvdan keyingi matbuot anjumanida mehmonlar bosh murabbiyi Jasur Abduraimov o‘z fikr mulohazalarini bildirdi.

"Bugun muxlislar haqiqiy derbining shohidi bo‘lishdi, deb o‘ylayman. Ikkala jamoa ham hujumkor, kombinasion futbol namoyish etishga harakat qildi. Cho‘zilib ketgan tanaffusdan keyingi ilk rasmiy uchrashuvga olmaliqliklar tezroq moslashishdi. Qolaversa omad ham maydon egalari tomonida bo‘ldi. Ular yaratilgan vaziyatlardan unumli foydalanishdi.

Bizda esa aksincha. Ba’zan qulay vaziyatlarda yakuniy zarbalarimiz aniq chiqmadi. Mo‘ljalni aniq olganimizda esa AGMK himoyachilari va darvozaboni matonat ko‘rsatishdi. Bir qator futbolchilarimizdagi mikro travmalar ham bizga pand berdi.

Zaxira o‘rindig‘imizning torligi haqida esa tinimsiz aytib kelayapman. Yozgi transfer oynasi ochilgach, jamoadagi bo‘shliqlarni to‘ldirish borasida jiddiy bosh qotirishimizga to‘g‘ri keladi. Olmaliqliklarni g‘alaba bilan tabriklayman. Biz esa ishlashda davom etamiz. Ketma-ket ikkita uchrashuvni endi uyda o‘tkazamiz. Har uch kunda maydonga chiqishimiz kerak. Garchi uyda o‘ynasakda oson bo‘lmasligini bilamiz. Raqiblarimiz o‘ta jiddiy – “Nasaf” va “Navbahor”. Umid qilamanki, yigitlar “boksingdey”da muxlislarni xursand qilish uchun o‘zlarida kuch va shijoat topa olishadi", - deydi Jasur Birodarovich.