АГМК – “Металлург” жамоалари ўртасидаги учрашувдан кейинги матбуот анжуманида меҳмонлар бош мураббийи Жасур Абдураимов ўз фикр мулоҳазаларини билдирди.

"Бугун мухлислар ҳақиқий дербининг шоҳиди бўлишди, деб ўйлайман. Иккала жамоа ҳам ҳужумкор, комбинацион футбол намойиш этишга ҳаракат қилди. Чўзилиб кетган танаффусдан кейинги илк расмий учрашувга олмалиқликлар тезроқ мослашишди. Қолаверса омад ҳам майдон эгалари томонида бўлди. Улар яратилган вазиятлардан унумли фойдаланишди.

Бизда эса аксинча. Баъзан қулай вазиятларда якуний зарбаларимиз аниқ чиқмади. Мўлжални аниқ олганимизда эса АГМК ҳимоячилари ва дарвозабони матонат кўрсатишди. Бир қатор футболчиларимиздаги микро травмалар ҳам бизга панд берди.

Захира ўриндиғимизнинг торлиги ҳақида эса тинимсиз айтиб келаяпман. Ёзги трансфер ойнаси очилгач, жамоадаги бўшлиқларни тўлдириш борасида жиддий бош қотиришимизга тўғри келади. Олмалиқликларни ғалаба билан табриклайман. Биз эса ишлашда давом этамиз. Кетма-кет иккита учрашувни энди уйда ўтказамиз. Ҳар уч кунда майдонга чиқишимиз керак. Гарчи уйда ўйнасакда осон бўлмаслигини биламиз. Рақибларимиз ўта жиддий – “Насаф” ва “Навбаҳор”. Умид қиламанки, йигитлар “боксингдей”да мухлисларни хурсанд қилиш учун ўзларида куч ва шижоат топа олишади", - дейди Жасур Биродарович.