Hech ham qiziqish doirasidan chetda qoldira olmayotganimiz "Kopa Amerika" turnirining 3-turi ham o‘z yakuinga yetdi. Qiziqarli o‘yinlar, bir qator rekordlar bilan bir qatorda turnir o‘ziga yarasha qiyinchiliklarga ham duch kelmoqda. Xususan, koronavirus bilan kasallanishlar holati tobora oshib bormoqda. Ammo bu chempionatning davom ettirilishiga to‘siq bo‘la olmayapti. Yakuniga yetgan 3-tur bizga bir qator qiziq bahslarni taqdim etdi. Shu natijalarni bir eslab o‘tamiz.
"A" guruhi
Avvalombor "A" guruhdagi o‘yinlarga to‘xtalib o‘tamiz. Ilk uchrashuvda ikki autsayder terma jamoa o‘zaro bahs olib bordi. Venesuyela - Ekvador o‘yini gollarga va havfli vaziyatlarga boy bo‘ldi. O‘yinning 39-daqiqasida Ayrton Presyado Ekvador foydasiga hisobni ochishga muvaffaq bo‘ldi. 51-minut o‘tib borayotgan bir paytda esa raqiblar hisobni tenglashtirishga erishdi. Oradan roppa-rosa 20 daqiqa o‘tib Gonsalo Plata yana o‘z jamoasini oldinga olib chiqdi. O‘yinga qo‘shib berilgan daqiqalarda Ronald Ernandes Venesuelani mag‘lubiyatdan qutqarib qolgan golga mualliflik qildi.
Ushbu guruhning ikkinchi o‘yinida biroz kutilmagan natija qayd etildi, ya’ni Kolumbiya Peruga imkoniyatni boy berdi. O‘yinning 17-daqiqasida Peru futbolchisi Serxio Penya hisobni ochib bergan bo‘lsa, 51-daqiqada Migel Anxel Borxa penaltidan foydalanib, hisobni tenglashtirdi. Biroz o‘tib esa Yerri Mina o‘z darvozasini ishg‘ol etib qo‘ydi va hisob boshqa o‘zgarmadi. Shunday qilib, Kolumbiya terma jamoasi ketma-ket ikkinchi o‘yin ochko yo‘qotmoqda.
"B" guruhi
Ushbu guruhda esa kurash ancha qizg‘in bo‘lmoqda. 3-tur ikkinchi kunidan o‘rin olgan ilk bahsda Chili - Urugvay jamoalari o‘rtasidagi qiziqarli bahs guvohi bo‘ldik. O‘yinning 26-daqiqasida Chili futbolchisi Eduardo Vargas hisobni ochdi. Ikkinchi bo‘limning 66-daqiqasida esa yana Chili futbolchisi Arturo Vidal gol urdi, ammo o‘z darvozasiga. Shunday qilib, ushbu o‘yin 1-1 hisobida o‘z yakuniga yetdi.
Ushbu guruhning ikkinchi o‘yinida Argentina terma jamoasi Paragvayga qarshi maydonga maydonga chiqdi. O‘yinning 10-daqiqasida Aleksandro Gomes hisobni ochib berdi va bu gol yagonaligini saqlab qoldi. Ushbu natijadan so‘ng, "Albisileste" karvonboshilikni davom ettirmoqda.
