Yevropa chempionatida guruh bosqichi yakunlanib qoldi. Faqatgina "F" guruhida so‘nggi tur uchrashuvlari qoldi.

"O‘lim guruhi" deb nom olgan mazkur guruhdan Fransiya terma jamoasi keyingi bosqichga masalasini hal qilib bo‘lgan. Ular bugun Portugaliya bilan to‘qnash kelishadi.

Parallel bahsda esa Germaniya va Vengriya terma jamoalari maydonga chiqishadi.

Xo‘sh, Portugaliya terma jamoasi va Krishtianu Ronaldu nimchorak finalga chiqishi uchun bugun qanday natijalar qayd etilishi kerak?

Santush jamoasi Fransiya ustidan g‘alaba qozonsa, guruhda kamida 2-o‘rinni egallaydi. Bu tushunarli. Durang ham portugallarni keyingi bosqichga olib chiqadi.

Portugaliya bugun fransuzlarga yutqazib qo‘ysa-chi? Bunda jamoaning taqdiri avvalo Vengriya qo‘lida bo‘ladi. Mojarlar Germaniya ustidan g‘alaba qozonishsa, guruhda 2-o‘ringa ko‘tarilib olishadi. Portugaliya esa guruhda so‘nggi o‘rinni egallab, musobaqa bilan xayrlashadi.

Vengriya nemislarga yutqazsa yoki durang o‘ynasa, Portugaliyani 3ta to‘p farqi bilan mag‘lubiyat (!) ham qanoatlantiradi. Shunda Ronaldu jamoadoshlari 3-o‘rinni egallagan jamoalar reytingida 4-pog‘onani band etishadi. Chunki reytingda 5-o‘rinni egallab turgan Finlyandiya 3 ochko jamg‘argan holda -2 (1-3) to‘plar farqiga ega. Portugallarda esa ayni paytdagi to‘plar nisbati +1 (5-4) ko‘rinishida. 3ta to‘p farqidagi mag‘lubiyat tufayli bu ikki jamoaning to‘plar farqi tenglashadi, ammo urilgan gollar soni tufayli Portugaliya yuqori o‘rinni egallaydi.

Portugaliya guruhda 3-o‘rinni egallasa, 1/8 finalda Belgiya bilan to‘qnash keladi. Bu juftlik g‘olibini chorak finalda Italiya-Avstriya o‘yini g‘olibi kutib turadi.