Европа чемпионатида гуруҳ босқичи якунланиб қолди. Фақатгина "F" гуруҳида сўнгги тур учрашувлари қолди.
"Ўлим гуруҳи" деб ном олган мазкур гуруҳдан Франция терма жамоаси кейинги босқичга масаласини ҳал қилиб бўлган. Улар бугун Португалия билан тўқнаш келишади.
Параллел баҳсда эса Германия ва Венгрия терма жамоалари майдонга чиқишади.
Хўш, Португалия терма жамоаси ва Криштиану Роналду нимчорак финалга чиқиши учун бугун қандай натижалар қайд этилиши керак?
Сантуш жамоаси Франция устидан ғалаба қозонса, гуруҳда камида 2-ўринни эгаллайди. Бу тушунарли. Дуранг ҳам португалларни кейинги босқичга олиб чиқади.
Португалия бугун французларга ютқазиб қўйса-чи? Бунда жамоанинг тақдири аввало Венгрия қўлида бўлади. Можарлар Германия устидан ғалаба қозонишса, гуруҳда 2-ўринга кўтарилиб олишади. Португалия эса гуруҳда сўнгги ўринни эгаллаб, мусобақа билан хайрлашади.
Венгрия немисларга ютқазса ёки дуранг ўйнаса, Португалияни 3та тўп фарқи билан мағлубият (!) ҳам қаноатлантиради. Шунда Роналду жамоадошлари 3-ўринни эгаллаган жамоалар рейтингида 4-поғонани банд этишади. Чунки рейтингда 5-ўринни эгаллаб турган Финляндия 3 очко жамғарган ҳолда -2 (1-3) тўплар фарқига эга. Португалларда эса айни пайтдаги тўплар нисбати +1 (5-4) кўринишида. 3та тўп фарқидаги мағлубият туфайли бу икки жамоанинг тўплар фарқи тенглашади, аммо урилган голлар сони туфайли Португалия юқори ўринни эгаллайди.
Португалия гуруҳда 3-ўринни эгалласа, 1/8 финалда Бельгия билан тўқнаш келади. Бу жуфтлик ғолибини чорак финалда Италия-Австрия ўйини ғолиби кутиб туради.
