Madridning «Real» klubi anchadan buyon Kilian Mbappe transferiga qiziqish bildirayotgani haqida barchamiz bilamiz. Dunyoning eng kuchli jamoalari fransiyalik hujumchi uchun katta mablag‘ sarflashga tayyor. Ular safiga endi sobiq Angliya chempioni «Liverpul» klubi ham qo‘shildi.

Xabarlarga ko‘ra, mersisaydliklar ehtimoliy transfer narxiga qiziqish bildirgan. Mbappening «PSJ» bilan shartnomasi keyingi yil yozda yakunlanadi va yangi shartnoma uchun harakatlar hali boshlanmagan. «Real» transfer qilish ehtimoli katta bo‘lgan fransiyalik uchun «Liverpul» ham kurashishi mumkinligi aslida ijobiy holat. «PSJ» direktori Nosir Al-Helayfiy bu haqida: «Mbappe hozir Yevro-2020da va sizni ishontirib aytamanki, u hech qayerga ketmaydi», deb qat’iy fikr bildirdi.

Jahonning nufuzli nashrlaridan biri «Marka» ham «Liverpul»ning ushbu transferga qiziqayotganini tasdiqladi. Ammo «Real» hali ham bu borada eng jiddiy da’vogar ekanini ma’lum qildi.

«Qaymoqranglilar» pandemiya tufayli moliyaviy inqirozlar qurshovida bo‘lsa ham Mbappe uchun qancha so‘ralsa ham berishga rozi deb yozadi, «Marka» o‘z xabarida. Bu uchun madridliklar hatto Luka Yovich, Dani Sebalyos, Brahim Dias kabi futbolchilaridan ham kechishga tayyor.

«Real» fransiyalik yosh hujumchi uchun 2017 yil – u «Monako»ni tark etgan paytidayoq qiziqish bildirgan. Biroq u paytlar madridliklar hujumida Ronaldu, Benzema, Beyl kabi taran futbolchilar bor edi. Endilikda Madrid tomonlarda vaziyat o‘zgargan: yaxshi hujumchiga muhtoj bo‘lib turibdi...

«Liverpul»da ham deyarli shunday holat. Mersisaydliklar uchun kelajakda yoshroq hujuchi kerak bo‘ladi. Biroq Mbappe xaridi ular uchun juda murakkab. Buni matbuot anjumanlarining birida Mbappening o‘zi «Real»da o‘ynash — men uchun orzu» deb aytganida ham ko‘rishimiz mumkin. Voqealar rivojini kuzatishda davom etamiz.

Jaloliddin Ismatov tayyorladi.