Kecha “Metallurg” professional futbol klubida rahbariyat va ishchi xodimlarning kengaytirilgan yig‘ilishi bo‘lib o‘tdi. Unda jamoa bosh murabbiyi Jasur Abduraimov, klub bosh direktori Abduqahhor Marifaliyev, klub texnik direktori Shavkat Saidov va boshqa ma’ul rahbarlar ishtirok etishdi.

Jamoa bosh murabbiyi Jasur Abduraimov “Metallurg”ning so‘nggi o‘yinlarida qayd etilgan natijalar hamda jamoa namoyish etayotgan hujumkor futboldan kelib chiqqan holda olib borilayotgan ishlar samarasi va istiqboli haqida so‘z yuritdi. Klub yaxlit mexanizmdan iborat ekanligi, uning barcha muruvvatlari bir maromda, sidqidildan ishlasagina yuksak natijalarga erishish mumkinligini qayd etdi. Klubning barcha xodimlari – rahbariyatdan tortib oddiy ishchilargacha yaxlit jamoa bo‘lishga barchani chorladi. Klub a’zolaridan ishga professional yondoshishni, hamjihatlikni so‘radi.

Futbolchilarga yaratilayotgan shart sharoitlar qoniqarli ekanligini ta’kidlagan holda, ish samaradorligi hamda sifatini yanada yaxshilar choralarini ishlab chiqish zarurligini e’tirof etdi.

"Shundagina biz muxlislar kutgan chiroyli, hujumkor futbolni namoyish etamiz. Natijalar ham o‘z o‘zidan yaxshilanib kelaveradi. Bizning mavsumdagi qatnashuvimiz kuzda – musobaqaning yakuniy jadvalida o‘z aksini topadi. Aynan yakuniy jadvalga – chempionat ko‘zgusiga qaragan muxlis bizning mehnatimiz, o‘yinimiz va natijamizdan qoniqish hosil qilsin", — dedi Jasur Birodarovich.

Shuningdek, yig‘ilishda so‘z olgan Abduqahhor Marifaliyev, Shavkat Saidovlar ham klub xodimlarini ahillikka, hamjihatlikka va ishda professionalikka da’vat etishdi.