Кеча “Металлург” профессионал футбол клубида раҳбарият ва ишчи ходимларнинг кенгайтирилган йиғилиши бўлиб ўтди. Унда жамоа бош мураббийи Жасур Абдураимов, клуб бош директори Абдуқаҳҳор Марифалиев, клуб техник директори Шавкат Саидов ва бошқа маъул раҳбарлар иштирок этишди.

Жамоа бош мураббийи Жасур Абдураимов “Металлург”нинг сўнгги ўйинларида қайд этилган натижалар ҳамда жамоа намойиш этаётган ҳужумкор футболдан келиб чиққан ҳолда олиб борилаётган ишлар самараси ва истиқболи ҳақида сўз юритди. Клуб яхлит механизмдан иборат эканлиги, унинг барча мурувватлари бир маромда, сидқидилдан ишласагина юксак натижаларга эришиш мумкинлигини қайд этди. Клубнинг барча ходимлари – раҳбариятдан тортиб оддий ишчиларгача яхлит жамоа бўлишга барчани чорлади. Клуб аъзоларидан ишга профессионал ёндошишни, ҳамжиҳатликни сўради.

Футболчиларга яратилаётган шарт шароитлар қониқарли эканлигини таъкидлаган ҳолда, иш самарадорлиги ҳамда сифатини янада яхшилар чораларини ишлаб чиқиш зарурлигини эътироф этди.

"Шундагина биз мухлислар кутган чиройли, ҳужумкор футболни намойиш этамиз. Натижалар ҳам ўз ўзидан яхшиланиб келаверади. Бизнинг мавсумдаги қатнашувимиз кузда – мусобақанинг якуний жадвалида ўз аксини топади. Айнан якуний жадвалга – чемпионат кўзгусига қараган мухлис бизнинг меҳнатимиз, ўйинимиз ва натижамиздан қониқиш ҳосил қилсин", — деди Жасур Биродарович.

Шунингдек, йиғилишда сўз олган Абдуқаҳҳор Марифалиев, Шавкат Саидовлар ҳам клуб ходимларини аҳилликка, ҳамжиҳатликка ва ишда профессионаликка даъват этишди.