AGMK klubi murabbiyi Xayrulla Karimov Superliganing 12-turi doirasida bo‘lib o‘tgan "Qo‘qon-1912"ga qarshi uchrashuv (2:1) borasida o‘z fikrini bildirib o‘tdi.

«O‘yin yaxshi o‘tdi deb o‘ylayman. "Qo‘qon-1912" bilan xoh uyda, xoh safarda bo‘lsin har doim qiziqarli uchrashuv bo‘ladi. O‘yin muxlislarga yoqdi deb umid qilaman. Muhimi, kerakli 3 ochkoga ega bo‘lib, tanaffusga yaxshi kayfiyatda yo‘l olyapmiz.

VAR? Menimcha, ushbu tizim bo‘lgani yaxshi, lekin to‘xtalishlar ko‘p bo‘lyapti. Bugungi vaziyatni oladigan bo‘lsak, VAR penaltini va qizil kartochkali holatni ko‘rib chiqdi. VAR bo‘lmaganida buning iloji bo‘lmasdi va balki boshqacha bo‘lib ketishi mumkin edi. Hakamlar tizim orqali adolatli qarorga kelishdi va haqli ravishda g‘alaba qozondik deb o‘ylayman. Yigitlarga o‘yin uchun rahmat deymiz, tanaffusga yaxshi kayfiyatda chiqib ketyapmiz», — dedi Xayrulla Karimov.