5 iyuldan e’tiboran O‘zbekiston professional futbol ligasi yozgi transfer oynasini ochdi. Mazkur jarayon shu oyning so‘nggi kunigacha davom etadi.
«Birinchi davra mobaynida bir qator o‘yinchilari – Nikita Pavlenko, Yevgeniy Makeev, Yevgeniy Chumak va Andrey Shipilov bilan xayrlashgan «Metallurg» klubi o‘z safini kuchaytirishni boshladi. Bekobod klubi yozgi transfer oynasining birinchi kuniyoq yangi o‘yinchilarni o‘z safiga qo‘shib oldi. Bular «Bunyodkor» futbolchisi Ibrohim Ibragimov hamda Rossiyaning «Nefteximik» klubining o‘zbekistonlik o‘yinchisi Bobur Davlatov», - deya yozadi klub rasmiy sayti.
Shuningdek, ikki nafar o‘yinchi ijaradan ortga qaytgan. Birinchi davrani «Andijon»da o‘tkazgan Muhammad Isayev va «Neftchi»da faoliyat yuritgan Xudoyshukur Sattorovlar ham qadrdon jamoasiga qaytgan.
Ma’lumot uchun, «Metallurg» Superliga 12-turidan keyin 16 ochko bilan 7-o‘rinda bormoqda.
