Avval xabar berganimizdek, Osiyo futbol konfederasiyasi 2022-yilgi U-23 Osiyo kubogi mezbonligini O‘zbekistonga taqdim etgan edi.

Mazkur chempionatning saralash bosqichi uchrashuvlari uchun qur’a tashlash marosimiga ham aynan mamlakatimizda o‘tkaziladigan bo‘ldi.

Qur’a jarayoni “Bunyodkor” stadionida 9-iyul soat 12.00 da boshlanadi. 46 ishtirokchi jamoa G‘arb va Sharq mintaqalariga bo‘lingan holda saralash bosqichida qatnashadi. Qur’a natijalariga ko‘ra jamoalar 11 ta guruhda 15 ta yo‘llanma uchun kurash olib boradi.

O‘zbekiston U-23 terma jamoasi final bosqichi mezboni sifatida to‘g‘ridan-to‘g‘ri yo‘llanmaga ega bo‘ladi. Shuningdek, yoshlar terma jamoamiz saralash uchrashuvlarida ham ishtirok etadi. Osiyo kubogi-2022 Saralash bosqichi bellashuvlari shu yili 23-31 oktyabr kunlari markazlashgan holda o‘tkazilishi rejalashtirilgan.

Qur’a tashlash marosimini o‘z nashrlarida yoritmoqchi bo‘lgan sportga ixtisoslashgan nashrlar tadbirda ishtirok etadigan 1 nafar (muxbir/fotograf/video-operator) xodim ism-familiyasini 8-iyul soat 13.00 ga qadar media@ufa.uz elektron pochtasiga yuborishi so‘raladi.

OAV vakillari marosim ishtirokchilari bilan muloqot qilishi qat’iyan man etiladi. Tadbir o‘tkaziladigan hududda sanitariya qoidalari va gigiyena normalariga amal qilish, o‘zaro ijtimoiy masofa saqlashi talab etiladi.