Italiya terma jamoasi himoyachisi Jorjio Kyellini "Skuadra Adzurra" Yevropa chempionati finalida to‘qnash keladigan Angliya tarkibining kuchini yuqori baholadi.

"Angliyada Keyndan tashqari ularning ikkala qanotida ham ajoyib o‘yinchilar bor, zaxira o‘yinchilari esa har qanday jamoani kuchaytirishi mumkin. Jek Grilish, Jeydon Sancho, Markus Reshford, Dominik Kalvert-Lyun, Fil Foden ... va "Liverpul" sardori Jordan Xenderson kabi futbolchilar zaxira o‘rindig‘ida. Umuman olganda, Angliya nihoyatda kuchli jamoa. Keynni ushlab turish qiyin, nihoyatda qiyin bo‘ladi. Uning Angliya terma jamoasidagi dastlabki o‘yinlaridan birini eslayman - biz o‘shanda Turinda o‘ynaganmiz. O‘shanda ham u menda yaxshi taassurot qoldirgandi. U boshi va oyoqlari bilan gol uradi, uzoq masofadan aniq zarba bera oladi", - deya UYEFA rasmiy sayti futbolchining so‘zlarini keltiradi.

Italiya - Angliya uchrashuvi 11 iyul yakshanba kuni bo‘lib o‘tadi. Boshlanishi Toshkent vaqti bilan 00:00 da.