Italiya terma jamoasi himoyachisi Jordjo Kyellini Angliyaga qarshi Yevro-2020 finali oldidan raqib hujumchisi Xarri Keyn haqida fikr bildirdi.
«Xarri Keynga qarshi birinchi marta o‘ynagan paytim hali ham esimda - bu o‘rtoqlik uchrashuvi edi. O‘shanda u o‘zining turli mahoratlari orqali meni hayratga solgandi.
Xarri texnik tomondan juda ham puxta, u uzoqdan kuchli va aniq zarba yo‘llay oladi, havoda ham yaxshi harakat qiladi. Shundan so‘ng men uning o‘yinlariga tan berganman va men haqiqatan ham uning ashaddiy muxlisiman.
Fabio Paratichidan so‘rashingiz mumkin, men uni A Seriyada ko‘rishni xohlaganman, u so‘nggi yillarda Keyn haqida qancha gaplashganimizni hisobga olib buni tasdiqlaydi. Bunday darajadagi hujumchilarga qarshi o‘ynash har doim yoqimli», - deydi Kyellini.
