Xabaringiz bor, ayni paytda "Navbahor" ko‘rigida bir qator xorijlik futbolchilar, jumladan, serbiyalik himoyachi Boyan Siger va hujumchi Jelko Dimitrov, braziliyalik himoyachi Portela De Akvino Saulo hamda hujumchi Kosta Tenorio Gutiner (Guti), shuningdek, rossiyalik hujumchi Pavel Ignatovich ko‘rikdan o‘tishmoqda.

Xo‘sh, ular yurtimiz futboli va “Navbahor” borasida qanday ma’lumotga egalar? Klub rasmiy sayti uchun serbiyalik legionerlar va braziliyalik himoyachi Portela De Akvino Saulodan qisqacha intervyu oldik.

— Namanganga kelguncha, o‘zbek futboli borasida ma’lumotga egamidinglar?

Saulo: — O‘zbek futboli borasida unchalik ko‘p ma’lumotga ega emasman. Faqatgina “Paxtakor” va “Navbahor” jamoalari haqida eshitganman. Shuningdek, “Navbahor”ning ajoyib muxlislarga ega ekanligi, jamoa ko‘plab sovrinlarni qo‘lga kiritganligi, yuqori o‘rinlar uchun kurash olib borishi to‘g‘risida ijtimoiy tarmoqlar orqali ma’lumotga ega bo‘ldim. Jamoa ko‘rigiga shu bois keldim.

Jelko Dimitrov: — O‘zbekistonda ko‘plab hamyurtlarimiz o‘ynayotganligi bois, o‘zbek futboli haqida oz bo‘lsada, tushuncham bor. Jumladan, “Paxtakor” va “Navbahor” jamoalari, hamyurtim Dragan Cheranning Superliga to‘purari bo‘lganligi, shuningdek, “Navbahor” O‘zbekistondagi eng ko‘p muxlisga ega jamoa, Namangan futbolsevarlar viloyati ekanligidan xabarim bor.

Aynan shuning uchun “Navbahor”da ko‘rikdan o‘tish uchun taklif bo‘lganida o‘ylanib o‘tirmay, ushbu taklifni qabul qildim.

Boyan Siger: — O‘zbekiston futboli haqida ma’lumotga egaman. “Navbahor”dan tashqari, “Bunyodkor” va “Paxtakor” singari jamoalar borligini bilaman. Shuningdek, “Navbahor”ning o‘z tarixi va nomiga ega jamoa, ko‘p marta mamlakat sovrindori bo‘lganligidan ham xabarim bor. Shuning uchun jamoa ko‘rigiga keldim.

“Navbahor” PFK matbuot xizmati.