“Navbahor” 2-davra bahslariga jiddiy tarzda tayyorgarlik ko‘rmoqda. Qurbon hayiti munosabati bilan bir kun dam olgan “lochinlar” 21 iyul kuni Toshkentga jo‘nab ketishdi va mashg‘ulotlarni poytaxtimizdagi  “To‘qimachi” stadionida o‘tkazishmoqda.

Jamoaning Toshkentdagi mashg‘ulotiga yangi legioner qo‘shildi. Bu asli shimoliy makedoniyalik, Bolgariya fuqaroligiga ega bo‘lgan yarim himoyachi Boyan Naydenov.

Boyan Naydenov – 1991 yil, 27 avgustda hozirgi Shimoliy Makedoniyada tug‘ilgan. Futbolchilik faoliyati davomida Shimoliy Makedoniyaning “Gorizont” (Turnova, 2010-2015 yillar), “Rabotnichki” (SkopYE, 2015-2017 yillar), Misrning “Smuxa SK” (Iskandariya, 2017 yil), Eronning “Istiqlol” (Tehron, 2018 yil),  Albaniyaning “Lachi” (Lachi, 2018-2019 yillar) klublarida o‘ynagan. 2020 yildan buyon Shimoliy Makedoniyaning “Vardar” (SkopYE) jamoasida to‘p tepayotgandi.

Naydenov 2014 yili Shimoliy Makedoniya terma jamoasi tarkibida 4 ta o‘yin o‘tkazgan.

2017 yili “Rabotnichki” tarkibida Shimoliy Makedoniya chempionatining bronza medalini qo‘lga kiritgan. Shuningdek, ushbu jamoa safida o‘sha yili Yevropa Ligasida 4 bahs o‘tkazib,  3 ta gol urgan.

Eslatib o‘tamiz, ayni paytda "Navbahor"da jami 3 nafar legioner  - serbiyalik himoyachi Boyan Siger, braziliyalik hujumchi Kosta Tenorio Gutiner hamda Boyan Naydenov ko‘rikdan o‘tishmoqda.  

“Navbahor” tarkibida  hozir 3 nafar legioner – rossiyalik va tojikistonlik yarim himoyachilar Ivan Solovyov hamda Ehsoni Panshanbe, serbiyalik hujumchi Slavisha Stoyanovich joy olishgan.

Demak, “lochinlar” ko‘rigidagi 3 nafar xorijlik futbolchidan jamoa murabbiylar shtabida yaxshi taassurot qoldirgan ikki nafari bilan shartnoma imzolanadi.

“Navbahor” poytaxtimizda 25 iyulgacha mashg‘ulot o‘tkazishni rejalashtirgan.

Shu kuni “lochinlar” Termizning “Surxon” jamoasiga qarshi o‘rtoqlik uchrashuvi o‘tkazib, keyin Namanganga qaytishadi.    

“Navbahor” PFK matbuot xizmati.