“Навбаҳор” 2-давра баҳсларига жиддий тарзда тайёргарлик кўрмоқда. Қурбон ҳайити муносабати билан бир кун дам олган “лочинлар” 21 июль куни Тошкентга жўнаб кетишди ва машғулотларни пойтахтимиздаги  “Тўқимачи” стадионида ўтказишмоқда.

Жамоанинг Тошкентдаги машғулотига янги легионер қўшилди. Бу асли шимолий македониялик, Болгария фуқаролигига эга бўлган ярим ҳимоячи Боян Найденов.

Боян Найденов – 1991 йил, 27 августда ҳозирги Шимолий Македонияда туғилган. Футболчилик фаолияти давомида Шимолий Македониянинг “Горизонт” (Турнова, 2010-2015 йиллар), “Работнички” (Скопье, 2015-2017 йиллар), Мисрнинг “Смуха СК” (Искандария, 2017 йил), Эроннинг “Истиқлол” (Теҳрон, 2018 йил),  Албаниянинг “Лачи” (Лачи, 2018-2019 йиллар) клубларида ўйнаган. 2020 йилдан буён Шимолий Македониянинг “Вардар” (Скопье) жамоасида тўп тепаётганди.

Найденов 2014 йили Шимолий Македония терма жамоаси таркибида 4 та ўйин ўтказган.

2017 йили “Работнички” таркибида Шимолий Македония чемпионатининг бронза медалини қўлга киритган. Шунингдек, ушбу жамоа сафида ўша йили Европа Лигасида 4 баҳс ўтказиб,  3 та гол урган.

Эслатиб ўтамиз, айни пайтда "Навбаҳор"да жами 3 нафар легионер  - сербиялик ҳимоячи Боян Цигер, бразилиялик ҳужумчи Коста Тенорио Гутинер ҳамда Боян Найденов кўрикдан ўтишмоқда.  

“Навбаҳор” таркибида  ҳозир 3 нафар легионер – россиялик ва тожикистонлик ярим ҳимоячилар Иван Соловьёв ҳамда Эҳсони Паншанбе, сербиялик ҳужумчи Славиша Стоянович жой олишган.

Демак, “лочинлар” кўригидаги 3 нафар хорижлик футболчидан жамоа мураббийлар штабида яхши таассурот қолдирган икки нафари билан шартнома имзоланади.

“Навбаҳор” пойтахтимизда 25 июлгача машғулот ўтказишни режалаштирган.

Шу куни “лочинлар” Термизнинг “Сурхон” жамоасига қарши ўртоқлик учрашуви ўтказиб, кейин Наманганга қайтишади.    

“Навбаҳор” ПФК матбуот хизмати.