Mamlakat milliy chempionati 13-turi doirasidagi "Qizilqum"  jamoasiga qarshi o‘yinga tayyorgarlik ko‘rayotgan Bekobodning "Metallurg" jamoasi kecha o‘z maydonida Tojikiston Respublikasining "Xo‘jand"  futbol klubi bilan xalqaro o‘rtoqlik uchrashuvini o‘tkazdi. Qiziqarli va murosasiz kechgan uchrashuvda maydon egalari 2:0 hisobida g‘alaba qozonishdi.

O‘yinning birinchi taymida jamoalar biroz ehtiyotkor futbol namoyish qilishdi. Mehmonlar asosan o‘z darvozasi dahlsizligini o‘ylashgan bo‘lishsa,  hujumkor futbol namoyish etayotgan bekobodliklarning oldingi chiziqda biroz o‘yini samara bermadi. Tanaffusdan keyin mezbonlar bosh murabbiyi tarkibni deyarli to‘liq o‘zgartirdi. Faollikni yanada kuchaytirgan, bosimni oshirgan "Metallurg" jamoasi hujumlarni ikki marta golga aylantirdi.

Avvaliga chap qanotdan Stanislav Andreev oshirib bergan to‘pni "Metallurg"ning yangi o‘yinchisi Farrux Ibrohimov boshi bilan urib raqib darvozasiga joylab qo‘ydi. Oradan biroz vaqt o‘tgach mehmonlar o‘z jarima maydonlari ichida Shahzodbek Nurmatovga qarshi qoida buzishdi. Penaltini Stanislav Andreev bexato amalga oshirdi -  2:0. Bu hisob o‘yin oxirigacha o‘zgarmay qoldi.

Metallurg  - Xo‘jand- 2:0 (0:0).
Hakamlar:  A. Risqullayev,  S. Shoyusupov,  A. Usmonov.
Nazoratchi:  B. Tog‘ayev.
Gollar:  F. Ibrohimov,  S. Andreev.