Мамлакат миллий чемпионати 13-тури доирасидаги "Қизилқум"  жамоасига қарши ўйинга тайёргарлик кўраётган Бекободнинг "Металлург" жамоаси кеча ўз майдонида Тожикистон Республикасининг "Хўжанд"  футбол клуби билан халқаро ўртоқлик учрашувини ўтказди. Қизиқарли ва муросасиз кечган учрашувда майдон эгалари 2:0 ҳисобида ғалаба қозонишди.

Ўйиннинг биринчи таймида жамоалар бироз эҳтиёткор футбол намойиш қилишди. Меҳмонлар асосан ўз дарвозаси даҳлсизлигини ўйлашган бўлишса,  ҳужумкор футбол намойиш этаётган бекободликларнинг олдинги чизиқда бироз ўйини самара бермади. Танаффусдан кейин мезбонлар бош мураббийи таркибни деярли тўлиқ ўзгартирди. Фаолликни янада кучайтирган, босимни оширган "Металлург" жамоаси ҳужумларни икки марта голга айлантирди.

Аввалига чап қанотдан Станислав Андреев ошириб берган тўпни "Металлург"нинг янги ўйинчиси Фаррух Иброҳимов боши билан уриб рақиб дарвозасига жойлаб қўйди. Орадан бироз вақт ўтгач меҳмонлар ўз жарима майдонлари ичида Шаҳзодбек Нурматовга қарши қоида бузишди. Пенальтини Станислав Андреев бехато амалга оширди -  2:0. Бу ҳисоб ўйин охиригача ўзгармай қолди.

Металлург  - Хўжанд- 2:0 (0:0).
Ҳакамлар:  А. Рисқуллаев,  С. Шоюсупов,  А. Усмонов.
Назоратчи:  Б. Тоғаев.
Голлар:  Ф. Иброҳимов,  С. Андреев.