Qilichbozlik sport turining sablya yo‘nalishida Tokio-2020 Olimpiya o‘yinlariga tashrif buyurgan Zaynab Dayibekova musobaqadagi uchinchi bahsini o‘tkazdi. Bu safar unga reytingda 14-o‘rinni egallab turgan koreyalik Ji Su Yun raqiblik qildi.

Hamyurtimiz bu bahsni ham hujumkor ruhda o‘tkazib, muhim g‘alabani qo‘lga kiritdi. Dayibekova birinchi bo‘limdan so‘ng hisobni 8-4ga ko‘rinishiga keltirib oldi. Ikkinchi bo‘limda esa Zaynab hisobni 14-9ga yetkazib, g‘alaba ostonasiga keldi. Ammo hal qiluvchi ochkoni qo‘lga kiritish vatandoshimiz uchun  biroz qiyin bo‘ldi. Janubiy Koreyalik sportchi 3 ochko ishlab, 14-12gacha hisobni qisqartirdi. So‘nggi hujum paytida texnika ikki sportchi baravar zarba berganini ko‘rsatdi. Videotakrorda esa o‘zbekistonlik qilichboz ildamroq bo‘lganini ko‘rsatdi — 15:12.

Shu tariqa, Zaynab Dayibekova chorak finalga chiqdi. U keyingi davrada Vengriya va Janubiy Koreya vakillari o‘rtasidagi jang g‘olibiga qarshi kurashadi. Dayibekova ishtirokidagi chorak final bahsi Toshkent vaqti bilan 11:25da start oladi.