Қиличбозлик спорт турининг сабля йўналишида Токио-2020 Олимпия ўйинларига ташриф буюрган Зайнаб Дайибекова мусобақадаги учинчи баҳсини ўтказди. Бу сафар унга рейтингда 14-ўринни эгаллаб турган кореялик Жи Су Юн рақиблик қилди.

Ҳамюртимиз бу баҳсни ҳам ҳужумкор руҳда ўтказиб, муҳим ғалабани қўлга киритди. Дайибекова биринчи бўлимдан сўнг ҳисобни 8-4га кўринишига келтириб олди. Иккинчи бўлимда эса Зайнаб ҳисобни 14-9га етказиб, ғалаба остонасига келди. Аммо ҳал қилувчи очкони қўлга киритиш ватандошимиз учун  бироз қийин бўлди. Жанубий Кореялик спортчи 3 очко ишлаб, 14-12гача ҳисобни қисқартирди. Сўнгги ҳужум пайтида техника икки спортчи баравар зарба берганини кўрсатди. Видеотакрорда эса ўзбекистонлик қиличбоз илдамроқ бўлганини кўрсатди — 15:12.

Шу тариқа, Зайнаб Дайибекова чорак финалга чиқди. У кейинги даврада Венгрия ва Жанубий Корея вакиллари ўртасидаги жанг ғолибига қарши курашади. Дайибекова иштирокидаги чорак финал баҳси Тошкент вақти билан 11:25да старт олади.