Yozgi olimpiadaning boks musobaqasida hakamlar bilan muammoga o‘zbekistonlik Mirazizbek Mirzaxalilov duch keldi.

52 kg. vaznda Tokio-2020 olimpiadasiga tashrif buyurgan hamyurtimiz o‘zining ilk jangini irlandiyalik Kurt Antoni Uokerga qarshi o‘tkazdi.

Raqib ilk raunddanoq ringga bo‘ylab qochish va qarshi hujumda yengil zarbalar berish bilan band bo‘ldi. Mirazizbek esa e’tiborni kuchli zarbalarga qaratgani bois, muntazam ravishda qochayotgan raqibni quvishga majbur bo‘ldi.

Birinchi bo‘limda Uoker zarbalar soni bo‘yicha ustunlik qildi va hakamlarning baholari bo‘yicha 4:1 hisobida oldinga o‘tib oldi.

Ikkinchi va uchinchi raundlarda esa Mirzaxalilov zarbalar soni va sifati bo‘yicha ustunlikka erishdi. U raqibini bir necha marta qiyin ahvolga solib qo‘ydi. Ammo hakamlar ustunlikni Uokerga taqdim etishdi. Yakuniy natija — 1:4 (30:27, 28:29, 28:29, 28:29, 28:29).

Shu tariqa, yetti nafar erkak bokschimizdan ikki nafar Tokio olimpiadasini tark etishdi.