Eldor Shomurodov "Roma"ga o‘tayotgani haqida bildingiz. Bu transfer hali rasman e’lon qilinmadi, biroq tafsilotlar ma’lum va rimliklar Tvitterdagi rasmiy akkaunti bu haqda ma’lum qilgani bor gap.

Endi bir jihatga e’tibor qaratmoqchiman (bu haqda kecha Futbol studiyada ham gaplashgandik): "Jenoa" aksar hollarda - chempionatning 70% o‘yinlarida ikkinchi jamoa bo‘lib o‘ynaydi. Bu o‘yin uslubida Shomurodov yorqinroq ko‘rinadi. Raqibga to‘p va hududni berib, qarshi hujumga tayanib, ta’qibdan qochib ketish va tezlanish olganidan so‘ng yo‘l-yo‘lakay 1-2 raqibdan o‘tib ketish Eldorning "fishka"si. U urgan gollarni yana bir bor tomosha qiling.

Xo‘sh, "Roma"da shunday davom etadimi?

"Roma" "Jenoa" emas, katta ehtimol bilan 70% o‘yinlarda 1-raqamli bo‘lib o‘ynaydi. Bunday holda raqiblar o‘z yarim maydonida harakatlanadi, himoya bir necha qator, zichlik yuqori. Afsuski, bunday o‘yinda Shomurodov eng yaxshi xislatlarini namoyish qila olmaydi. Joze Mourinyo qo‘l ostida u mana shu aspektlarini ham o‘stiradi, deb umid qilamiz.

U Ballardini ishonchi, rusiyzabon klubdoshi va o‘rganib ulgurgan muhitidan yangi joyga, katta murabbiy qo‘liga va mavhum kelajak tomon qadam bosdi. Yana bir yil qolishi kerakmidi yo ayni vaqtida bu chaqiriqni qabul qildimi? Bu savolga ma’lum vaqt o‘tgach javob olamiz. Ungacha esa tavakkal qilgan vatandoshimizga har o‘yinda, har bir harakatida omad tilaymiz.

Eldor - pioner. Yevropaga o‘zbek yo‘lini ochib bergan yigit bo‘lib tarixda qolsin, ilohim.

Forsa, "jalorossi"!

Bobur Akmalov.