Элдор Шомуродов "Рома"га ўтаётгани ҳақида билдингиз. Бу трансфер ҳали расман эълон қилинмади, бироқ тафсилотлар маълум ва римликлар Твиттердаги расмий аккаунти бу ҳақда маълум қилгани бор гап.

Энди бир жиҳатга эътибор қаратмоқчиман (бу ҳақда кеча Футбол студияда ҳам гаплашгандик): "Женоа" аксар ҳолларда - чемпионатнинг 70% ўйинларида иккинчи жамоа бўлиб ўйнайди. Бу ўйин услубида Шомуродов ёрқинроқ кўринади. Рақибга тўп ва ҳудудни бериб, қарши ҳужумга таяниб, таъқибдан қочиб кетиш ва тезланиш олганидан сўнг йўл-йўлакай 1-2 рақибдан ўтиб кетиш Элдорнинг "фишка"си. У урган голларни яна бир бор томоша қилинг.

Хўш, "Рома"да шундай давом этадими?

"Рома" "Женоа" эмас, катта эҳтимол билан 70% ўйинларда 1-рақамли бўлиб ўйнайди. Бундай ҳолда рақиблар ўз ярим майдонида ҳаракатланади, ҳимоя бир неча қатор, зичлик юқори. Афсуски, бундай ўйинда Шомуродов энг яхши хислатларини намойиш қила олмайди. Жозе Моуриньо қўл остида у мана шу аспектларини ҳам ўстиради, деб умид қиламиз.

У Баллардини ишончи, русийзабон клубдоши ва ўрганиб улгурган муҳитидан янги жойга, катта мураббий қўлига ва мавҳум келажак томон қадам босди. Яна бир йил қолиши керакмиди ё айни вақтида бу чақириқни қабул қилдими? Бу саволга маълум вақт ўтгач жавоб оламиз. Унгача эса таваккал қилган ватандошимизга ҳар ўйинда, ҳар бир ҳаракатида омад тилаймиз.

Элдор - пионер. Европага ўзбек йўлини очиб берган йигит бўлиб тарихда қолсин, илоҳим.

Форца, "жалоросси"!

Бобур Акмалов.