Superliganing 13-turidan o‘rin olgan «Metallurg» va «Qizilqum» jamoalari o‘rtasidagi uchrashuvdan keyingi matbuot anjumanida dastlab jurnalistlarning savollariga mehmonlar bosh murabbiyi Hamidjon Aktamov javob qaytardi.

— Har doim tannaffusdan keyin mana shunday og‘ir o‘yinlar bo‘lib o‘tadi. Bugun ikkala jamoa ham qiynalishdi. Qo‘pol o‘yin guvohi bo‘ldik, shunday bo‘lsada g‘alaba qozondik. Ushbu g‘alaba bilan jamoamiz muxlislarini tabriklayman. «Metallurg» jamoasining keyingi uchrashuvlarida omad tilab qolaman.

— «Metallurg» jamoasidan qanday o‘yin kutgandingiz?
— Avvalgi uchrashuvda mag‘lub bo‘lgandan keyin, «Metallurg» jamoasidan boshqacha o‘yin kutgandim. Uchrashuvda yaxshi o‘yin ko‘rsatdi va vaziyatlar yarata oldi.

— Boshlang‘ich tarkibda mezbonlar hujumchisiz boshlagani sizni ajablantirmadimi?
— Ajablanganim yuq, sababi biz ham bunday ko‘rinishda ko‘p o‘ynaganmiz.

— Oybek Qilichevni jamoada olib qolishning iloji bormidi?
— Uning ham o‘z xohishi bor. Maydonda o‘zining xohishi bilan harakat qiladi. Demak, bizdan ham yaxshiroq taklif bo‘ldi va u jamoadan ketdi.

— Keyingi turdagi raqibingiz «Andijon» jamoasi haqida nima deya olasiz?
— Yaxshi jamoa shakllangan. Lekin u yerga ham g‘alaba uchun boramiz.