Qozog‘iston boks delegasiyasi o‘z tarixida ilk marta olimpiya o‘yinlarida oltin medalni qo‘lga kirita olmaydigan bo‘ldi. Bu safar qo‘shnilarimizning birorta ham charm qo‘lqop ustasi finalga chiqa olmadi.

Qozog‘istonlik ikki bokschi Qamshibek Qo‘nqabayev (91+ kg.) va Saken Bibossinov (52 kg.) yarim finalgacha yetib kelishgan edi. Eng og‘ir vazndagi sportchi kecha amerikalik Richard Torresga yutqazgan bo‘lsa, yengil vazndagi bokschi bugun britaniyalik Jalol Yafayga imkoniyatni boy berdi (2:3).

Shu tariqa, final janglarida qozog‘istonlik bokschilar ishtirok etishmaydi. Vaholanki, 1996 yildan boshlab mustaqil Qozog‘istonning kamida bir vakili olimpiya o‘yinlarida oltin medalni qo‘lga kiritib kelgan edi.

Atlanta-1996 — Vasiliy Jirov (81 kg)
Sidney-2000  — Bekzat Sattarxanov (57 kg) va Yermaxan Ibraimov (71 kg)
Afina-2004 — Baxtiyor Artayev (69 kg)
Pekin-2008 — Baxt Sarsekbayev (69 kg),
London-2012 — Serik Sapiyev (69 kg)
Rio-2016  — Daniyar Yeleusinov (69 kg).