Қозоғистон бокс делегацияси ўз тарихида илк марта олимпия ўйинларида олтин медални қўлга кирита олмайдиган бўлди. Бу сафар қўшниларимизнинг бирорта ҳам чарм қўлқоп устаси финалга чиқа олмади.

Қозоғистонлик икки боксчи Қамшибек Қўнқабаев (91+ кг.) ва Сакен Бибоссинов (52 кг.) ярим финалгача етиб келишган эди. Энг оғир вазндаги спортчи кеча америкалик Ричард Торресга ютқазган бўлса, енгил вазндаги боксчи бугун британиялик Жалол Яфайга имкониятни бой берди (2:3).

Шу тариқа, финал жангларида қозоғистонлик боксчилар иштирок этишмайди. Ваҳоланки, 1996 йилдан бошлаб мустақил Қозоғистоннинг камида бир вакили олимпия ўйинларида олтин медални қўлга киритиб келган эди.

Атланта-1996 — Василий Жиров (81 кг)
Сидней-2000  — Бекзат Саттарханов (57 кг) ва Ермахан Ибраимов (71 кг)
Афина-2004 — Бахтиёр Артаев (69 кг)
Пекин-2008 — Бахт Сарсекбаев (69 кг),
Лондон-2012 — Серик Сапиев (69 кг)
Рио-2016  — Данияр Елеусинов (69 кг).