AGMK bosh murabbiyi Mirjalol Qosimov «Nasaf»ga qarshi bo‘lib o‘tgan o‘yin (1:1) borasida o‘z fikrini bildirib o‘tdi.

«Qiziqarli o‘yin guvohi bo‘ldik. Bugun muhim uchrashuv edi. O‘yin so‘nggida hakam tomonidan qo‘shib berilgan daqiqada alamli gol o‘tkazib yubordik. Futbol shunisi bilan qiziq. O‘ylashimcha, muxlislar jangovor o‘yin tomosha qilishdi. Hakamning o‘yinni yakunlovchi hushtagi chalingunicha o‘ynash kerak. Lekin yakuniy natija adolatli bo‘ldi, chamamda.

Ikkinchi bo‘limda shunchaki tepish maqsadidagi uzoqdan beriladigan zarbalar ko‘payib ketdi. Biz qulay vaziyatga chiqishimiz mumkin bo‘lgan pallalarda noto‘g‘ri harakatlandik. «Nasaf» yutqazayotgani uchun hujumga o‘tdi va bizda bo‘sh hududlar ochildi. Lekin bundan bir necha bor unumli foydalana olmadik. Aqlni ishlatib futbol o‘ynaydigan yoki qaror chiqaradigan pallada futbolchilarimiz bundan foydalanishmadi. Ikkinchi golni urganimizda o‘yin balki boshqacha tus olgan bo‘lardi. Hayot davom etadi. Kelasi o‘yinlarga yanada jiddiyroq tayyorgarlik ko‘ramiz. Bizni oldinda «Paxtakor» bilan bo‘ladigan bahsga qadar kubok o‘yini kutmoqda. Shu bois biz avval “Neftchi” bilan o‘yinga taraddud ko‘ramiz», — dedi Qosimov.