Taekvondo bo‘yicha Tokio-2020 Olimpiadasi chempioni Ulug‘bek Rashitov «O‘zbekiston iftixori» faxriy unvoni bilan taqdirlanganidan xabaringiz bor. Chempionimiz buning uchun davlatimiz rahbariga minnatdorchilik izhor qildi.

“Muhtaram Prezidentimizga sportga shu qadar ko‘p vaqt ajratayotganlari uchun katta rahmat aytmoqchiman. Shu tufayli biz sportchi yoshlarda barcha sharoitlar bor va xalqaro musobaqalarda g‘olib bo‘lish uchun barcha imkoniyat mavjud. Davlatimiz rahbari tomonidan «O‘zbekiston iftixori» faxriy unvoni berilishi men uchun katta sharaf. Prezidentimizning qo‘llab-quvvatlashi bilan har qanday marralarni zabt eta olamiz.

Men O‘zbekiston bayrog‘ini yuqoriga ko‘tarishga, madhiyamiz yangrashiga va xalqimizni xursand qilish uchun borimni beraman. Tokiodagi Olimpiadadan keyin O‘zbekistonga qaytib kelganimizda yurtdoshlarimiz bizni ajoyib tantana bilan kutib olishdi. Menimcha, hech qaysi mamlakatda sportchilarni bunday kutib olishmagan. Buning uchun hukumatimizga katta rahmat aytaman. Xudo xohlasa, 2024 yil Parij Olimpiadasida ham oltin medalni olib kelishga va’da beraman.

Tokiodagi Olimpiada finali vaqtida ortimda xalqim, Prezidentim va oilam turganini his qildim. Parijdagi Olimpiadada barcha o‘zbekistonlik sportchilarda oltin medal bo‘lishini tilab qolaman. Yana bir bor katta rahmat», – deydi Ulug‘bek Rashitov.