Eldor Shomurodov nafaqat maydonda, balki uning tashqarisida ham «Roma» uchun foydali transfer bo‘ldi.

O‘zbekistonlik futbolchining transferi e’lon qilinishi polshalik yo‘qolgan qizchaning topilishiga sabab bo‘ldi. Gap shundaki, «Roma» 2019 yildan buyon yangi xaridni e’lon qilganda futbolchilar tanishtiriladigan videoga qidiruvda bo‘lgan bolalarning suratini joylashtiradi. Agar rasmdagi bolalar kimgadir tanish bo‘lsa, videoda joylashtirilgan tegishli tashkilotlar raqamlariga qo‘ng‘iroq qilish mumkin.

Bu g‘oya ish berib kelmoqda. «Roma» Buyuk Britaniya, Italiya, Gresiya, Belgiya, Keniya va endi Polshada yo‘qolib qolgan 12 nafar bolaning topilishiga yordam berdi.

Eldor bundan xursand: «Yo‘qolgan qizchaning topilib, oilasining tashvishi kamayganidan xursandman. Futbolning mashhurligidan mana shu tarzda foydalanadigan klubning a’zosi ekanligimdan faxrlanaman».

"Bu loyihani butun «Roma» jamoasi qo‘llab-quvvatlaydi. Klub 12 nafar bolakayning topishiliga o‘z hissasini qo‘shganidan faxrlanadi. Albatta, asosiy ishni biz hamkorlik qiladigan tashkilotlar bajaradi. Ular har safar bizga yana bir bolakay topilgani haqida xabar berganda, boshimiz osmonga yetadi", — deydi «Roma»ning marketing bo‘yicha direktori Maks van den Dul.