Xabaringiz bor, O‘zbekiston 17-25 sentyabr kunlari ayollar o‘rtasidagi Osiyo chempionati saralash bahslariga mezbonlik qiladi. Mamlakatimiz ayollar milliy terma jamoasi ham ushbu musobaqada ishtirok etadi.

Vakillarimiz saralash bosqichi uchrashuvlariga tayyorgarlik rejasiga asosan Turkiya, Belarus va yurtimiz maydonlarida o‘quv-mashg‘ulot yig‘ini tashkil etib, Afrika chempioni hisoblangan Nigeriya, Ekvator Gvineyasi, shuningdek, Belarus, Eron, Hindiston kabi terma jamoalarga qarshi o‘rtoqlik o‘yinlari o‘tkazdi.

Kecha O‘FA birinchi vise-prezidenti Ravshan Ermatov O‘zbekiston ayollar milliy terma jamoasi murabbiylar shtabi bilan uchrashib, muhim turnirga tayyorgarlik jarayoni va tashkiliy masalalarni muhokama qildi.

Yig‘ilish avvalida saralash bosqichiga tayyorgarlik doirasida o‘tkazilgan xalqaro o‘rtoqlik uchrashuvlari natijalari tahlil etildi hamda keyingi o‘yinlar rejalari ko‘rib chiqildi. Zarur tibbiy vositalar bilan ta’minlash, vitaminizasiya, tibbiy ko‘rikdan o‘tkazish, futbolchilarning jismoniy va funksional holatini monitoring qilib borishda zamonaviy texnologiyalardan foydalanish masalalari muhokama etildi.

Shuningdek, mazkur turnirga mas’ul Tashkiliy qo‘mita mutaxassislari bilan musobaqa tashkilotchiligiga doir bir qator masalalar, xususan, futbol maydonlarini turnirga hozirlash, o‘yinlar oldidan amalga oshiriladigan tashkiliy ishlarni tizimli yo‘lga qo‘yish va mavjud kamchiliklar ustida ishlash bo‘yicha topshiriqlar berildi.