Joriy yilning 4-11 sentyabr kunlari Rossiyaning Qozon shahrida I MDH o‘yinlari bo‘lib o‘tdi. Unda ishtirok etgan O‘zbekiston delegasiyasi 23 ta oltin, 32 ta kumush va 36 ta bronza, jami 91 ta medal qo‘lga kiritib, umumjamoa hisobida mezbonlardan so‘ng ikkinchi o‘rinni egalladi. Ushbu musobaqada ishtirok etgan delegasiyamiz Vatanimizga qaytib keldi. Islom Karimov nomidagi Toshkent xalqaro aeroportining 3-Terminalida o‘tgan tantanali marosimda O‘zbekiston Respublikasi Bosh vazirining o‘rinbosari, Turizm va sport vaziri Aziz Abduhakimov, O‘zbekiston Respublikasi Bosh vazirining o‘rinbosari Behzod Musayev, Rustam Shoabdurahmonov boshchiligidagi MOQ rahbariyati, Turizm va sport vazirligimutasaddilari, ko‘p sonli muxlislar va sportchilarimizning yaqinlari ishtirok etishdi.

Yosh atletlarimiz aeroportda tantanali kutib olindi. Tadbirni Aziz Abduhakimov va Behzod Musayev ochib berishdi. Mutasaddilar so‘z o‘rnida yosh sportchilarimizni qo‘lga kiritilgan muvaffaqiyat bilan qutlab, ularning kelgusi faoliyatlarida omad va zafarlar tilab o‘tishdi. Shuningdek, O‘zbekiston xalq artisti Tesha Mo‘minov, O‘zbekiston Yozuvchilar uyushmasi a’zosi, shoir G‘ayrat Majid ham o‘zlarining iliq tilaklarini yo‘lladilar.

Shundan so‘ng birinchi MDH o‘yinlarida g‘olib va sovrindor bo‘lgan sportchilarimizga O‘zbekiston Respublikasi Prezidenti sovg‘asi topshirildi. Unga ko‘ra, musobaqada oltin medalga sazovor bo‘lgan sportchilarga 25 million, ularning ustozlariga 12.5 million, kumush medal sohiblariga 15 million va ularning trenerlariga 7.5 million, bronza medali egalariga esa 10 million, ularni tarbiyalagan murabbiylariga 5 million so‘mdan pul mukofotlarining sertifikatlari topshirildi. Estradamizning bir qator yorqin vakillari ijrosidagi kuy-qo‘shiqlar tantanali marosimga o‘zgacha fayz berdi.

Keyin tadbir ishtirokchilari ajratilgan ikki qavatli maxsus avtobuslarda poytaxtimiz bo‘ylab MOQ tomon sayrga chiqishdi. Ularni ko‘plab hamshaharlarimiz poytaxtimiz ko‘chalari bo‘ylab olqishlab turishdi.

Tantanali marosimning mantiqiy yakuni MOQ binosida bo‘ldi. Unda delegasiyamiz bir jamoa bo‘lib, esdalik uchun suratga tushishdi va ular ishtirokida fleshmob yozib olindi.