O‘zbekistonda yangi sport tashkiloti — Funksional ko‘pkurash federasiyasi tashkil etildi. Bu haqda Turizm va sport vazirligi matbuot xizmati xabar berdi.
Unga ko‘ra, Funksional ko‘pkurash federasiyasi prezidenti etib Milliy gvardiya qo‘mondoni o‘rinbosari Ma’mur G‘aniyev tayinlandi. Ichki ishlar vaziri o‘rinbosari B.Abdullayev va Milliy gvardiya harbiy xizmatchisi L.Rahmatullayeva esa federasiya vise-prezidentlari etib tayinlandi.
Ma’lumot o‘rnida, funksional ko‘pkurash — bu ko‘p energiya talab qiluvchi, ko‘p bo‘g‘imli harakatlardan foydalanadigan sport turi bo‘lib, u erkin og‘irlikdagi mashqlar, shaxsiy tana og‘irligi bilan mashqlar, siklik (kardio) mashqlardan foydalangan holda maxsus tuzilgan komplekslar to‘plamlarini birlashtirib, bir vaqt davomida uzluksiz bajarishlarni o‘z ichiga oladi.
Ushbu sport turining asosiy vazifasi — tananing turli tizimlarini jadal rivojlantirish va umumiy sog‘likni mustahkamlashdan iborat. Kombinasiyalashgan mashqlar ishtirokchilarni chiniqtirish, ularni chidamlilik darajasini oshirish, jismoniy imkoniyatlarini har qanday yuklamaga moslashtirishdan iborat.
