Ўзбекистонда янги спорт ташкилоти — Функционал кўпкураш федерацияси ташкил этилди. Бу ҳақда Туризм ва спорт вазирлиги матбуот хизмати хабар берди.

Унга кўра, Функционал кўпкураш федерацияси президенти этиб Миллий гвардия қўмондони ўринбосари Маъмур Ғаниев тайинланди. Ички ишлар вазири ўринбосари Б.Абдуллаев ва Миллий гвардия ҳарбий хизматчиси Л.Раҳматуллаева эса федерация вице-президентлари этиб тайинланди.

Маълумот ўрнида, функционал кўпкураш — бу кўп энергия талаб қилувчи, кўп бўғимли ҳаракатлардан фойдаланадиган спорт тури бўлиб, у эркин оғирликдаги машқлар, шахсий тана оғирлиги билан машқлар, циклик (кардио) машқлардан фойдаланган ҳолда махсус тузилган комплекслар тўпламларини бирлаштириб, бир вақт давомида узлуксиз бажаришларни ўз ичига олади.

Ушбу спорт турининг асосий вазифаси — тананинг турли тизимларини жадал ривожлантириш ва умумий соғликни мустаҳкамлашдан иборат. Комбинациялашган машқлар иштирокчиларни чиниқтириш, уларни чидамлилик даражасини ошириш, жисмоний имкониятларини ҳар қандай юкламага мослаштиришдан иборат.