Yurtimizda futbol ixlosmandlari kam emas. Ularning millionlar o‘yiniga mehr qo‘yishida futbolni san’at darajasiga olib chiqqan charm to‘p ustalari muhim o‘rin tutadi.

Mamlakatimizda ham o‘zlarining chiroyli va betakror o‘yinlari bilan futbol muxlislari yoqimtoyiga aylangan futbolchilar kam emas. Ana shunday mahoratli futbolchilarimizdan biri Odil Ahmedovdir.

Kuni kecha taniqli futbolchi o‘zi tahsil olgan Respublika Olimpiya zaxiralari kollejida bo‘lib, bo‘lajak futbolchilar va kollej tarbiyalanuvchilari bilan uchrashdi.

Uchrashuvda Odil Ahmedov o‘zining bosib o‘tgan hayot yo‘li haqida yosh avlod vakillariga gapirib berdi. O‘z navbatida ROZK o‘quvchi-sportchilari ham o‘zlarini qiziqtirgan savollar bilan murojaat qilishdi va atroflicha javob olishdi.

Ta’kidlash kerak, bu kabi uchrashuvlar yosh avlod qalbida sportga bo‘lgan havasni yanada oshirib, kelajakda ularning yetuk sportchilar bo‘lib ulg‘ayishiga xizmat qiladi.