Юртимизда футбол ихлосмандлари кам эмас. Уларнинг миллионлар ўйинига меҳр қўйишида футболни санъат даражасига олиб чиққан чарм тўп усталари муҳим ўрин тутади.

Мамлакатимизда ҳам ўзларининг чиройли ва бетакрор ўйинлари билан футбол мухлислари ёқимтойига айланган футболчилар кам эмас. Ана шундай маҳоратли футболчиларимиздан бири Одил Аҳмедовдир.

Куни кеча таниқли футболчи ўзи таҳсил олган Республика Олимпия захиралари коллежида бўлиб, бўлажак футболчилар ва коллеж тарбияланувчилари билан учрашди.

Учрашувда Одил Аҳмедов ўзининг босиб ўтган ҳаёт йўли ҳақида ёш авлод вакилларига гапириб берди. Ўз навбатида РОЗК ўқувчи-спортчилари ҳам ўзларини қизиқтирган саволлар билан мурожаат қилишди ва атрофлича жавоб олишди.

Таъкидлаш керак, бу каби учрашувлар ёш авлод қалбида спортга бўлган ҳавасни янада ошириб, келажакда уларнинг етук спортчилар бўлиб улғайишига хизмат қилади.