Italiya chempionatining 6-turidan o‘rin olgan «Inter» va «Atalanta» jamoalari o‘rtasidagi uchrashuv voqealarga boy bo‘ldi.

Bahsning 5-daqiqasida Lautaro Martines hisobni ochgan bo‘lsa, taym oxiriga qadar ustunlik bergamoliklar tomoniga o‘tdi va ular ikki marta raqib darvozasiga yo‘l topishdi. Malinovskiy va Toloi "Inter" darvozasini ishg‘ol qilishdi.

Ikkinchi bo‘limda esa "neradzurri" tempni oshirdi. Oqibatda 71-daqiqada mezbonlar Jekoning goli evaziga muvozanatni tiklashdi.

Uchrashuvdagi asosiy voqealar so‘nggi daqiqalarda ro‘y berdi. Bahsning 86-daqiqasida hakam "Atalanta" darvozasi tomon penalti belgiladi. Dimarkoning zarbasidan keyin esa to‘p to‘singa tegib yuqoriga ko‘tarilib ketdi.

Oradan 2 daqiqa o‘tib bergamoliklar raqib darvozasini ishg‘ol qilishdi. Lekin VAR yordamida gol bekor qilinganini ko‘pchilik tushunmay qoldi. "Atalanta" raqib darvozasini ishg‘ol qilishdan bir necha soniya avval "Inter" posboni Xandanovich maydonni tark etayotgan to‘pni maydonga qaytargandi. O‘sha paytda to‘p chiziqni kesib o‘tishga ulgurgan ekan.

Shu tariqa, har ikkala jamoa g‘alabani ilib ketishi mumkin bo‘lgan vaziyatda jangovar durang qayd etildi. Ushbu natijadan so‘ng "Inter"ning ochkolari 14taga, "Atalanta"niki esa 11taga yetdi.

Italiya A seriyasi, 6-tur
Inter – Atalanta 2:2 (1:2, 1:0)
Gollar: 1:0 – 5 Martines, 1:1 – 30 Malinovskiy, 1:2 – 38 Toloi, 2:2 – 71 Jeko.
Inter – Xandanovich, Darmian (Dumfris, 57), de Vrey, Shkrinyar, Bastoni (Dimarko, 57), Perishich, Brozovich, Chalxanoglu (Vesino, 57), Barella (Satriano, 90), Jeko, Martines (Sanches, 81).
Atalanta – Musso, Dzappakosta (Pashalich, 77), Palomino (Mele, 70), Toloi, Demiral, Gozens, de Ron, Froyler, Pessina (Gimshiti, 63), Malinovskiy (Ilichich, 62), Sapata (Pikkoli, 63).
Ogohlantirishlar: Malinovskiy (4), Bastoni (12), Palomino (19), Sapata (21), Chalxanoglu (43), Dzappakosta (64), Barella (70), Toloi (90).