Sardor Rashidov OFK kubogi yarim finalida.
«Quvayt SK» klubi OFK kubogi-2021 «G‘arb» mintaqasi finali (turnir yarim finali maqomida)ga chiqdi. Tarkibida Sardor Rashidov o‘ynaydigan jamoa bu huquqni o‘z maydonida «Al-Salt» (Iordaniya)ni 2:0 hisobida yengib, qo‘lga kiritdi. To‘g‘ri, hamyurtimiz ushbu bahsda ishtirok etmadi. «Quvayt SK» endi «G‘arb» zonasi finalida Bahraynda «Al-Muharraq» mehmoni bo‘ladi.
Chalqancha zarba bilan gol.
BATE Belarus chempionati 24-turida «Rux» bilan safar o‘yinida alamli tarzda ochko yo‘qotdi - 2:0 hisobida oldinda bora turib, yakunda g‘alabani qo‘ldan chiqardi (2:2). Borisov jamoasi boshlang‘ich tarkibida maydonga tushgan Shahboz Umarov 66-daqiqada o‘z o‘rnini zaxira vakiliga bo‘shatib berdi. «Energetik-BGU» esa «Vitebsk»ni qabul qildi va 2:2 hisobini qayd etdi. Bu bahsda mezbonlar hujumida Shahzod Ubaydullayev - Bobur Abduxoliqov juftligi harakatlandi. 42-daqiqada Shahzod aynan Boburning uzatmasidan keyin akrobatik zarba vositasida hisobni 1:1ga yetkazdi. Umuman, Ubaydullayev to‘liq vaqt maydonda to‘p surdi, Abduxoliqov esa 66-daqiqada almashtirildi. Jamoa safidagi yana bir vakilimiz Doniyor Abdumannopov bel sohasidagi jarohat tufayli chetda qolyapti.
Yagona gol kifoya...
«Al-Nasr» Saudiya Arabistoni Premyer-ligasi navbatdagi turida «Al-Batin»ni qabul qilib, 34-daqiqada Taliska tomonidan urilgan yagona gol evaziga 3 ochko oldi. Jamoa yarim himoyachisi Jaloliddin Masharipov bu g‘alabaga doimgidek, 90 daqiqalik faol harakati bilan hissa qo‘shdi.
«O‘zbekcha derbi»da Iskanderov g‘olib...
J.Koreya «K»-ligasi 32-turida ikki hamyurtimiz maydonda to‘qnash keldi. Aniqroq aytsak, «Seongnam» va «Kanvon» o‘rtasidagi bahsda mezbonlar yarim himoyachisi Jamshid Iskanderov 86 daqiqa to‘p surgan bo‘lsa, mehmonlar himoyachisi Rustam Ashurmatov to‘liq vaqt harakatlandi. Natijaga kelsak, yakunda «Seongnam» 2:0 hisobida g‘alaba qozondi - «o‘zbekcha derbi»da Iskanderov ustun.
Shukurov - gol assistenti.
«Sharja» klubi BAA Pro-ligasi 5-turida «Al-Jazira» maydoniga safar uyushtirib, irodali g‘alabani tantana qildi - 2:1. Diqqatga sazovor tomoni, 82-daqiqada hisobni tenglashtiruvchi golga Otabek Shukurov assistentlik qildi. Umuman, hamyurtimiz maydonda 90 daqiqa davomida tinim bilmadi.
«Sherif» yaqqol ustun.
Moldova chempionati 11-turidan o‘rin olgan «Sherif» - «Floresht» o‘yini 4:0 hisobida yakunlandi. Tiraspol klubida ijara muddatini o‘tayotgan hujumchi Jasur Yaxshiboyev asosiy tarkibda maydonga tushib, 62-daqiqagacha to‘p surdi. «Sherif» keyingi turda «Dinamo-Avto» mehmoni bo‘lib, mezbonlarni 7ta javobsiz gol bilan «siyladi». Yaxshiboyev bunisida 67-daqiqada zaxiradan maydonga tushdi. Eslatish kerak, «Sherif» bugun CHL guruh bosqichi 2-turi doirasida «Real» mehmoni bo‘ladi.
Natija bobida beqarorlik.
«Roma» «A» seriya 5-turidan o‘rin olgan o‘yinda «Udineze»ni 1:0 hisobida yengdi. «Bo‘rilar» hujumchisi Eldor Shomurodov «Stadio Olimpiko» arenasida o‘tkazilgan ushbu uchrashuvning atigi 86-daqiqasida maydonga tushirildi. Yakshanba kuni esa Joze Mourinyo shogirdlari «Rim derbisi»da «Lasio»ga yutqazishdi - 2:3. Hamyurtimiz o‘yinga yana zaxiradan qo‘shildi, faqat ertaroq (64-daqiqada).
