«Barselona» Lionel Messisiz birinchi mavsumini juda yomon boshladi. Hamma Ronald Kumanning iste’fosini kutmoqda, bu tez orada bo‘lishi kerak. Stadion.uz sayti klubdagi vaziyatni biroz tahlil qilib ko‘rishga urinib ko‘rdi.
Shanba kuni Ispaniya chempionatida super o‘yin bo‘lib o‘tadi. Madridda amaldagi chempion «Atletiko» «Barselona»ni qabul qiladi. Katta ehtimol bilan, bu uchrashuv Ronald Kuman uchun «ko‘k-anorranglilar» ustozi sifatida oxirgi uchrashuv bo‘ladi. Bundan tashqari, niderlandiyalik murabbiy diskvalifikasiya qilingan, shuning uchun u yana maydon chetida ham bo‘lolmaydi. To‘g‘ri, bu qay darajada kataloniyaliklar o‘yini uchun qay darajada ta’sir qilishi noma’lum.
Hamma «Barselona»ning Lionel Messisiz birinchi mavsumi, qachon sodir bo‘lgan bo‘lsa ham, juda qiyin bo‘lishini tushinardi. Biroq, hech kim kataloniyaliklarning uzoq yillik yetakchisi jamodan ketsa, bu qadar og‘ir vaziyatga tushib qolishini kutmagandi. Ispaniya chempionatida kataloniyaliklar hozirda oltinchi, yo‘qotilgan ochkolar bo‘yicha esa to‘rtinchi o‘rinda. Peshqadam «Real» bilan ochkolar bo‘yicha farq kichik bo‘lsada, lekin o‘yin jihatidan «qaymoqlilar» ancha kuchliroq ko‘rinishmoqda. Kataloniyaliklar Chempionlar ligasi haqida umuman eslashni xohlamayaptilar. «Bavariya»ga qarshi 0:3 hisobini muxlislar qabul qila olishdi, lekin «Benfika»dan uchralgan mag‘lubiyatni qabul qilib bo‘lmaydi.
Qizig‘i shundaki, «Barselona» barcha moliyaviy qiyinchiliklarga qaramay, Kumanga Messini yo‘qotish jamoaga kamroq zarar keltirishi uchun hamma sharoitlarni qildi. Unga bir yildan beri so‘rab kelayotgan Memfis Depay va Lyuk de Yongni jamoaga olib kelishdi. Kuman bu mavsumda «Barselona»ni Niderlandiya terma jamoasi futbolchilari bilan qayta qurishi mumkin edi. Biroq, hozircha na yaxshi qurilgan o‘yin, na istiqbol ko‘rinadi.
Kumanning o‘zi ham jamoani oldinga yetaklay olmayotganini tushundi. Uning asabiylashishi va g‘alati matbuot anjumanlari vaziyat niderlandiyalikning nazoratidan chiqib ketganini ta’kidlaydi. Kuman, suzib yetishi mumkin bo‘lgan masofani bosib o‘tdi. «Barselona» barcha turnirlardagi so‘nggi oltita uchrashuvda faqat bir marta g‘alaba qozonganini, hatto «Granada» va «Kadis» bilan ham ochkolarni baham ko‘rayotganiga qarasak, murabbiyning ahvolini tushunish mumkin.
Bunday vaziyatda ketma-ket muvaffaqiyatli uchrashuvlar uni qutqarib qolishi mumkin edi, lekin hozirda kataloniyaliklarning taqvimi juda murakkab: «Atletiko», «Valensiya», «Dinamo» Kiyev va «Real». «Barselona»ning hozirgi holatiga nazar tashlasak, bir narsani ishonch bilan aytish mumkinki, Ronald Kuman «klasiko»gacha yetib bormaydi. Ehtimol, bu «Barselona» uchun yaxshilikkadir.
«Barselona» kadrlar bilan bog‘liq qiyinchiliklarini boshidan kechirayotgani aniq. Shu bilan birga, Kuman jamoaning va uning ixtiyorida bo‘lgan futbolchilarning imkoniyatlarini ham tog‘ri baholay olmayapti. Kataloniyaliklar har qanday holatda ham «Granada», «Kadis» va «Benfika»ni mag‘lub etishlari kerak edi. Bu «janglar»dagi omadsizliklar aniq murabbiy xatolari bilan bog‘liq.
Albatta, hammani bir savol qiynamoqda, Kuman o‘rnini kim egallashi mumkin? Yurgen Klopp haqidagi mish-mishlarga ishonishning ma’nosi yo‘q, ayniqsa, nemis mavsum o‘rtalarida «Liverpul»ni tark etishini siz ham tasavvur qila olmaysiz. Tyeri Anri «Monako» boshqaruvidagi tajribasidan so‘ng, uni «Barselona»ga yaqinlashishiga yo‘l qo‘ymaslik kerak. Xavi najot farishtasi bo‘lishi ham dargumon. Ehtimol, u murabbiy sifatida iqtidorlidir, lekin yana, yosh mutaxassisni cho‘kayotgan kemani qutqarish uchun qoldirish juda xavfli qadamdir. Balki Roberto Martines mos variant bo‘lardi, lekin shuni tushunish kerakki, u besh yil davomida klub miqyosida ishlamagan, Belgiya terma jamoasi ham so‘nggi yillarda Martinesni ishdan bo‘shatish uchun sabab ko‘rmaydi.
Ko‘rinib turibdiki, hozirgi «Barselona» uchun ideal murabbiy ... Zinedin Zidan. «Real»dagi fransuz har qanday muammo bilan har qanday tarkibda qanday muvaffaqiyat qozonish mumkinligini ko‘rsatdi. Zidan nima bo‘lishidan qat’i nazar, har safar moslashishga va g‘alaba qozonishga muvaffaq bo‘ldi. Biroq, fransuz hech qachon «Barselona»ni boshqarmasligi aniq.
Katta ehtimol bilan shanba kuni «Atletiko» «Barselona»ni mag‘lub etadi va Kuman ishdan bo‘shatiladi. Shu bilan birga, mavsum oxirigacha kataloniyaliklarni vaqtinchalik mutaxassis boshqarishi mumkin, bu mavsumni shunchaki tugatish uchun, va kelasi yozda yangi yuqori malakali mutaxassisni topish mumkin bo‘ladi.
Nima bo‘lgan holatda ham har qanadu buyuk klub tarixiga nazar solar ekansiz, unda qora chiziqlar borligiga guvoh bo‘lasiz. «Barselona» hozir aynan shunday qora kunlarni boshdan kechirmoqda. Bunday vaziyatda muxlislar qo‘llab-quvvatlashi har qachongidan muhimdir. Futbolni seving, «Barselona»ni seving!
Ruslan Maksimov tayyorladi.
