Ispaniya La Ligasining 8-turidan o‘rin olgan markaziy uchrashuvida «Atletiko» va «Barselona» jamoalari o‘zaro to‘qnash kelishdi.
Butun o‘yin davomida to‘p nazorati kataloniyaliklar tomonida bo‘ldi, ammo Simeone jamoasi himoyada mustahkam harakat qilib, qarshi hujumlarda raqibni jazoladi.
Uchrashuvning 23-daqiqasida Luis Suaresning uzatmasidan keyin Toma Lemar darvozabon bilan yakkama-yakka vaziyatga chiqib ketdi va hisobni ochdi. Birinchi bo‘lim yakunlanishi arafasida Suaresning o‘zi ter Shtegen bilan yuzma-yuz holatga chiqib borib, sobiq jamoasi darvozasini ishg‘ol qildi. Urugvaylik futbolchi gol urgach, uni nishonlamadi, aksincha, "Barsa" muxlislaridan uzr so‘radi.
Ikkinchi bo‘limda"Barsa" hisobni qisqartirish uchun bitta yaxshi imkoniyatga ega bo‘ldi. Gavining uzatmasidan so‘ng Koutinyo darvozabon qarshisida yolg‘iz qoldi, ammo u to‘pni darvozabonning zo‘iga tepgani uchun Oblak zarbani qaytardi.
Shu tariqa, o‘yinda hisob o‘zgarmadi va "ko‘k-anorranglilar" joriy mavsum La Ligadagi dastlabki mag‘lubiyatni qabul qilib oldi.
Ushbu g‘alabadan keyin «Atletiko» ochkolarini 17 taga yetkazib olgan holda 2-o‘ringa ko‘tarildi. «Barselona» (12) esa 9-pog‘onaga tushib ketdi.
La liga, 8-tur
2 oktyabr, shanba
«Atletiko» — «Barselona» 2:0
Gollar: 1:0 – 23 Lemar, 2:0 – 44 Suares.
«Atletiko»: Oblak, Savich, Ximenes, Ermoso (Felipe, 81), Lyorente, Karrasko (Lodi, 81), Koke, de Paul (Trippyer, 46), Lemar, Suares (Grizmann, 72), Joau Feliks (Korrea, 72).
«Barselona»: ter Shtegen, Mingesa (de Yong, 75), Pike, Arauxo, Dest (Langle, 86), Buskets, Koutinyo (Fati, 64), de Yong, Niko Gonsales (Serxi Roberto, 46), Gavi (Puch, 75), Depay.
Ogohlantirishlar: Gavi (20), de Paul (45), Koke (78).
