Superliganing 21-turidan o‘rin olgan “Bunyodkor” - AGMK (1:1) uchrashuvidan so‘ng mezbonlar bosh murabbiyi Shuhrat Maqsudov fikrlari bilan o‘rtoqlashdi.

- Qiyin, og‘ir o‘yin bo‘lishini bilgandik. Chunki “Nasaf”ga qarshi uchrashuvdan so‘ng tarkibda uch nafar yo‘qotishga duch kelgandik. Umumiy hisobda esa, yo‘qotishlarimiz soni besh nafarga yetgandi. Shuning uchun bugun tarkibga yosh o‘yinchilarni kiritishga majbur bo‘ldik. Bu aslida yaxshi, shaxsan o‘zim ham yoshlarga imkoniyat berishni ma’qul ko‘raman. Futbolchilarga rahmat! Borlarini berib harakat qilishdi. O‘tkazib yuborilgan golda darvozamiz tomon qo‘yilgan jarima zarbasini ko‘rib chiqishim kerak. Uchrashuvni oynai jahon orqali tomosha qilgan do‘stlarimni menga bergan ma’lumotiga ko‘ra, o‘sha vaziyatda jarima zarbasi qarama-qarshi tomonga ko‘rsatilishi kerak bo‘lgan.

Nurilloning holatini ertaga tibbiy ko‘rikdan keyin bilib olamiz. Albatta ko‘rikdan keyin javob yaxshi bo‘ladi, deb umid qilamiz. Jarohatlar ko‘payib ketdi. Superligada yuzaga kelgan tanaffus foydamizga xizmat qiladi degan niyatdaman. Futbolchilarim tiklanib oladi.

Farrux Ikromovning jarohatini davolatish uchun sarf-xarajatlarni O‘FA to‘lab berdi. Buning uchun ularga minnatdorchilik bildiramiz. Farrux bilan o‘zimiz ham har kuni aloqadamiz, gaplashib turibmiz.

Yaratganga shukr, rahbarlarimiz futbolni juda yaxshi tushunadi. Shuning uchun bizga hech qanday bosim bo‘layotgani yo‘q. “Bunyodkor”ning nomi bor. O‘sha nomga mos ravishda o‘ynashni, yaxshi natijalarga erishishni maqsad qilganmiz.