O‘zbekiston milliy terma jamoasi bosh murabbiyi Srechko Katanes O‘FA matbuot xizmatiga o‘rtoqlik uchrashuvidagi raqiblar va tarkib haqida fikrlarini bildirib o‘tdi.

«Iordaniya va Malayziya terma jamoalari Assosiasiyada mavjud bo‘lgan variantlar orasidan tanlab olindi. Buning uchun hech qanday alohida sabab yo‘q. Biz aynan shu ikkita terma jamoaga qarshi o‘ynaymiz, degan talabni qo‘ymaganmiz. Hozirgi vaqtda o‘rtoqlik uchrashuvlariga raqib topish ancha mushkul. Bundan tashqari bunday rejalar 6 oy yoki 1 yil oldin amalga oshirilishi kerak.

Terma jamoaga yaqinda bosh murabbiy bo‘lganim uchun O‘FAda ham sparring raqib topishga ko‘p vaqt bo‘lgani yo‘q. Bizda barcha futbolchilarni kuzatish uchun 1 oygina vaqt bor edi. Shu maqsadda ko‘plab yangi nomlarni mazkur yig‘inga jalb qildik. Oldimizda turgan o‘yinlarda barchaga o‘yin amaliyotini berishga harakat qilamiz. Keyingi yig‘inlarda balki yana boshqa ijrochilarni taklif qilarmiz. Ko‘p narsa ularning o‘ziga bog‘liq. Berilgan imkoniyatdan yaxshi foydalana olishsa navbatdagi yig‘inlarga ham chaqiriladi. Bu yig‘inda o‘zini ko‘rsata olmaganlar keyinchalik o‘zini ko‘rsatishi mumkin»,- deydi Srechko Katanes.

Eslatib o‘tamiz, yig‘in davomida Srechko Katanes shogirdlari 9 oktyabr kuni Malayziya, 12 oktyabrda esa Iordaniya terma jamoalari bilan o‘rtoqlik uchrashuvida maydonga tushishadi.