Ўзбекистон миллий терма жамоаси бош мураббийи Сречко Катанец ЎФА матбуот хизматига ўртоқлик учрашувидаги рақиблар ва таркиб ҳақида фикрларини билдириб ўтди.
«Иордания ва Малайзия терма жамоалари Ассоциасияда мавжуд бўлган вариантлар орасидан танлаб олинди. Бунинг учун ҳеч қандай алоҳида сабаб йўқ. Биз айнан шу иккита терма жамоага қарши ўйнаймиз, деган талабни қўймаганмиз. Ҳозирги вақтда ўртоқлик учрашувларига рақиб топиш анча мушкул. Бундан ташқари бундай режалар 6 ой ёки 1 йил олдин амалга оширилиши керак.
Терма жамоага яқинда бош мураббий бўлганим учун ЎФАда ҳам спарринг рақиб топишга кўп вақт бўлгани йўқ. Бизда барча футболчиларни кузатиш учун 1 ойгина вақт бор эди. Шу мақсадда кўплаб янги номларни мазкур йиғинга жалб қилдик. Олдимизда турган ўйинларда барчага ўйин амалиётини беришга ҳаракат қиламиз. Кейинги йиғинларда балки яна бошқа ижрочиларни таклиф қилармиз. Кўп нарса уларнинг ўзига боғлиқ. Берилган имкониятдан яхши фойдалана олишса навбатдаги йиғинларга ҳам чақирилади. Бу йиғинда ўзини кўрсата олмаганлар кейинчалик ўзини кўрсатиши мумкин»,- дейди Сречко Катанец.
Эслатиб ўтамиз, йиғин давомида Сречко Катанец шогирдлари 9 октябрь куни Малайзия, 12 октябрда эса Иордания терма жамоалари билан ўртоқлик учрашувида майдонга тушишади.
