Xabaringiz bor, shu kunlarda Saudiya Arabistonining Jidda shahri sayyoramizning eng kuchli og‘ir atletikachi o‘smirlarini o‘zida jam qilgan.

Musobaqaning uchinchi kungi bahslarida ham hamyurtlarimiz munosib ishtirokni davom ettirishdi. Dastlab, musobaqada -61 kg vazn toifasida Madinabonu Jo‘rayeva ikkikurash natijasiga ko‘ra, umumiy 179 kg natija qayd etib, 5-o‘rinni qo‘lga kiritdi.

Ayniqsa, hamyurtlarimizning e’tibor markazida -71 kg vazn toifasidagi o‘smir qizlar o‘rtasidagi bellashuvlar turgandi. Sababi ushbu vazn toifasida ikki nafar hamyurtimiz medallar uchun kurash olib borishdi.

Hamyurtimiz Nigora Suvonova musobaqada 3ta kumush medalni qo‘lga kiritdi. U dast ko‘tarishda eng yuqori natijasi 92 kg shtangani o‘ziga bo‘ysundirib, kumush medaliga sazovor bo‘ldi.

Nigora Suvonova siltab ko‘tarish mashqlarida ham ajoyib natija qayd etdi. U 114 kg natija bilan yana bir kumush medani sohibasiga aylandi. E’tiborlisi, ikkikurash natijasiga ko‘ra ham hamyurtimiz ikkinchi o‘rinni band etdi va jahon chempionatidan 3ta medal bilan qaytadigan bo‘ldi.

Ushbu vaznda siltab ko‘tarish mashqida Sevinchoy Komilova 111 kg natija qayd etib, 3-o‘rinni egalladi va terma jamoamiz hisobiga navbatdagi bronza medalini qo‘shib qo‘ydi.