«Paxtakor» futbol klubi bosh direktori Dmitriy Adisman O‘zbekiston U-14 chempionati haqida fikr bildirdi.

«Chempionatning tashkilotchilik darajasini barcha yuqori baholamoqda. «Chig‘atoy» stadionida ikkita o‘yinni kuzatdim.

Futbolchilar yosh bo‘lishiga qaramasdan juda ham murosasiz o‘yin ko‘rsatishdi. «Odil-Junior» jamoasini alohida ta’kidlagan bo‘lardim, yaxshi o‘yinchilari talaygina.

Ushbu chempionatda ishtirok etgan barcha futbolchilar kelajakda Olimpiya, qolaversa milliy terma jamoa futbolchilari bo‘lishi mumkin.

Klublar rahbariyati bolalar futboliga ko‘proq e’tibor qaratishlari lozim. Turnirlar sonini va sifatini oshirish lozim. Xalqaro tajribani ham oshirish zarur. Bu bolalarda yoshlikdan jamoa uchun javobgarlik hissini uyg‘otadi, dunyoqarashi kengayadi, vatanparvarlik hisi oshadi. Jismoniy tayyorgarlikni ham esdan chiqarmaslik kerak.

Xulosa qilib aytganda, O‘zbekiston U-14 chempionati kabi turnirlarni ko‘paytirish — o‘zbek futboli kelajagi haqida qayg‘urishdir. Bu borada O‘zPFL oldinga katta qadam tashladi», — deydi Adisman.