U turnirning bunday saviyada o‘tishini kutmaganligini tan oldi.

"Bunyodkor" jamoasi bosh direktori Ulug‘bek Mirzayev Toshkentda o‘tkazilgan U-14 O‘zbekiston chempionati haqida fikr bildirdi.

"O‘zbekiston U-14 chempionati tashkilotchiligi bunchalik yuqori saviyada o‘tishini kutmagan edim. Har bir uchrashuv eng yaxshi o‘yinchisiga berilgan sovg‘alar, o‘sha sovrinlarning xilma-xilligi, taqdirlash marosimi katta bayramdek o‘tgani ko‘zni quvontirdi.

"Chig‘atoy"dagi har bir o‘yin Youtube platformasida jonli efirda va sharhlovchi bilan o‘tgani katta yutuq bo‘lganini ta’kidlash joiz.

Markazlashtirilgan holda o‘tgan turnir klubimizning seleksiya ishlari uchun ham qo‘l keldi. Futbolchilarni ko‘rdik, yaqin kelajakda o‘z akademiyamizga taklif qilishimiz mumkin.

"Bunyodkor U-14" jamoasi bosh murabbiyi akademiyamizning 2011-yilda tug‘ilgan futbolchilarini ham shug‘ullantiradi. Turnir boshlanishidan 1 kun oldin ushbu jamoa bilan Moskva shahridagi turnirdan qaytgan edi.

"Bunyodkor" futbol klubi doim bolalar futboliga alohida e’tibor bilan qaragan. Albatta, shu yo‘sinda davom etamiz",- dedi Mirzayev