Futbol klublari a’zolari borki, raqib jamoa qaysi shahardan ekanligiga, albatta qiziqadi. Uzoq manzildagi jamoa bo‘lsa, boz ustiga mehmonxona va restoran tizimi ko‘ngildagidek bo‘lmasa, ich-ichidan “Tezroq quyi ligaga tushib keta qolsa edi”, degan o‘y o‘tishi tabiiy.

Farg‘onaning “Neftchi” va Samarqandning “Dinamo” jamoalari Superligaga yo‘llanma olgan kuni boshqalarni bilmadim-u, bizning jamoa chempion bo‘lgandek xursand bo‘lishdi. Chunki o‘zining shonli tarixiga ega “Neftchi” va “Dinamo” – Superligamizga yana-da ko‘rk bag‘ishlaydi, Farg‘onaday go‘zal hamda Samarqandday azim tarixiy shaharlarimiz tarovatidan yana bir bor bahra olish baxtiga muyassar bo‘lish imkoni tug‘iladi. Qolaversa, bu shaharlarda qadrdon do‘stlar bisyor.

Xullas, ushbu ikki jamoa a’zolarini va jonkuyar muxlislarini Superliga yo‘llanmasi bilan chin qalbdan tabriklab qolamiz. Futbol maydonalarida ko‘rishguncha!

Abror Pirriyev
"Lokomotiv" klubi shifokori.