Bundan bir necha soatlar oldin O‘zbekiston Milliy Olimpiya Qo‘mitasining majlislar zalida «Muradov Professional League» aralash jang san’atlari xalqaro turniri oldidan tashkil etilgan matbuot anjumani yakunlandi.

Tadbirda MOQ Bosh kotibi Oybek Qosimov, «Muradov Professional League» kompaniyasining asoschisi Mahmud Murodov, jangchilar Bahodir Bakiyev, Ramazon Temirov, Shohanas Mirzamatovlar ishtirok etishdi.

Quyida ushbu matbuot anjumanida yangragan fikrlarni e’tiboringizga havola etamiz.

Dastlab tadbirni Milliy Olimpiya Qo‘mitasi bosh kotibi Oybek Qosimov ochib berdi. Shundan so‘ng ushbu turnir asoschisi Mahmud Muradov musobaqa haqida o‘z fikr-mulohazalarini bildirgan holda anjumanga tashrif buyurganlarni qiziqtirgan savollariga javob berdi. Shuningdek, bo‘lajak janglar oldidan o‘zbek sportchilari bilan ham qiziqarli suhbatlar bo‘lib o‘tdi.

Mahmud Murodov: "Avvalambor ushbu turnirni tashkillashtirgan hamda bizni qo‘llab-quvvatlagan barchaga minnatdorchilik bildirmoqchiman. Bu aralash jang san’atlari bo‘yicha O‘zbekistondagi ilk voqelik. Barchaga birdek qiziq bo‘ladi deb o‘ylayman. Yaqinda Nukusda o‘tgan Markaziy Osiyo chempionatini ko‘pchilik kuzatib bordi. Bu kabi turnirlar yoshlar uchun tramplin vazifasini o‘tab beradi. Sog‘lom turmush tarzi bosh vazifamizga aylanishi kerak. MMA targ‘ibotini Toshkent bilan cheklab qo‘ymaymiz.

Jasur Alijonov: Avvalambor, barcha OAVga ushbu tadbirni yoritishga bel bog‘laganlari uchun rahmat aytaman. Ushbu musobaqani o‘tkazishdan asosiy maqsad yoshlarni jang san’atlariga qiziqtirish, bu sport turini yurtimiz bo‘ylab yanada ommalashtirish hisoblanadi. Bu orqali yoshlarni turli yot oqimlarga kirib qolishlaridan saqlagan bo‘lamiz.

Ikkinchidan, MMA borasida O‘zbekistonni qanday salohiyatga ega ekanini barcha raqiblarga ko‘rsatib qo‘yish imkoniyatiga egamiz. Turkiya, Qozog‘iston, Qirg‘iziston hamda Yevropaning bir qator mamlakatlari bilan o‘zaro tajriba almashish g‘oyalari ham ustuvor o‘rinda turadi. O‘z ustimizda ishlashda davom etamiz. Bu tashkilotni ochishdan maqsad ham shular. Barcha sportchilarga omad tilab qolaman.

Ushbu turnirdan tushgan mablag‘ Mahmud Murodovning cho‘ntagiga tushmaydi. Pullarni xayriyaga yo‘naltirish fikri kimdan chiqqan?

- Avvalo men bu turnirni qo‘shimcha daromad yuzasidan ochmadim. Bu sport turini orqasidan yetarli mablag‘ga ega bo‘lganman. Men ortiqcha narsalarni o‘ylaganim yo‘q. Yuqorida ta’kidlaganimdek, birinchi o‘rinda yoshlar salomatligi. Bu o‘zimdan chiqqan g‘oya. Musobaqadan tushgan pullarni sportchilar uchun bonuslarga hamda mehribonlik uylariga yo‘naltiramiz.

Ushbu turnirda qanday toifali referilar faoliyat olib boradi? Xorijlik hakamlar ham tashrif buyuradimi?

- Albatta, deyarli barcha referilar Yevropadan tashrif buyurgan guruh a’zolari. Ular Amerika va Yevropada ishlagan hamda mashhur Bellatorlar orqali tanilgan professional hakamlar. Shuningdek, mahalliy hakamlar ham bu yerda yordamchi bo‘lib tajriba oshirishlari mumkin. O‘zaro hamkorlikdagi faoliyat muvaffaqiyatli chiqishiga ishonaman.

Yurtimizda yaqin yillar davomida MMAga katta e’tibor qaratilyapti. Buni mas’ullar faqat Toshkentda emas, balki viloyatlarda ham keng targ‘ib qilishlari zarur.

- Albatta, nafaqat MMA balki qolgan sport turlari ham sekin-asta viloyatlarga yoyilib boradi. Kecha Nukusda bo‘lgan musobaqani olasizmi, yoki bo‘lmasa Andijonda o‘tkazilgan boks oqshominimi birin-ketin bular amalga oshyapti. Biz aralash jang san’atlarini butun respublikaga yoyishni maqsad qilganmiz. Biroq ko‘rib turipsiz, hakamlar va murabbiylar borasida taqchillik mavjud. Ayni dam birdaniga ko‘plab jamoalarga asos solishning iloji yo‘q. Bu O‘zbekistondagi ilk yirik turnirlardan biri va bu yerda birdaniga katta planka olib bo‘lmaydi.

Raqiblarni qanday o‘rganib chiqdingiz, tayyorgarlik qay darajada kechdi?

- (Ramazon Temirov) Ushbu raqibim bilan 2 yil oldin ham kuch sinashganman. Bu vaqt oralig‘ida Braziliyada mashg‘ulotlar olib bordim. Tayyorgarlikni yaxshi deb ayta olaman, murabbiylar ko‘rsatmasi bilan istalgan natijaga erishishimizga ko‘zim yetyapti.

(Shohanas Mirzamatov)

Raqibim serbiyalik Aleksandr Yankovichni yaxshilab o‘rgandim. U asosan «stoyka»da jang qiladi. 3 oy davomida uzluksiz mashq olib bordik. Tayyorgarlik borasida muammo bo‘lmadi. Maksimal 100 foiz tayyormiz deb ayta olaman.

(Bahodir Bakiyev)

Raqiblarimning barcha janglarini diqqat bilan kuzatib chiqdim. Albatta har bir raqib shu yo‘ldan boradi. Avvalasi bu sport. Oldindan bir nima deb bo‘lmaydi. Biroq g‘alabalarimizni oldindan sezyapman.

Jahonning ko‘zga ko‘ringan sportchilarini yurtimizga taklif etish borasida rejalar bormi?

- Bu rejalarimizda bor. Floyd Meyvezer, Xabib singari sportchilar bilan o‘zaro tajriba almashish niyat yo‘q emas. Ular bilan munosabatlarimiz yaxshi va albatta, bu sportchilar yurtimizga tashrif buyurishadi.

Shohanas Mirzamatov oktagon ligalardagi shartnomasini tugatdimi yoki janglarda davom etaveradimi?

- Hozir faqat Mahmud Muradov bilan shartnomam bor va boshqa ligalarga fikrimni chalg‘itganim yo‘q. Ushbu kelishuv tugagach qolgan shartnomalarni o‘ylab ko‘rishim mumkin.

Ushbu ligani havaskor yoshlar uchun ham tashkillashtirsa bo‘ladimi? Junior sportchilar qanday qilib ishtirok etishlari mumkin?

- Hozirgi turnir professional maqomda o‘tmoqda. Unda faqatgina kattalar ishtirok etishi mumkin. Chunki bu reyting ballari uchun o‘ynaladi. Tashrif buyuruvchi raqiblar ham prof kadrlar. Bundan ko‘zlangan asosiy maqsad ushbu sportni kelayotgan muxlislarga chiroyli qilib ko‘rsatib berish. Kelgusi musobaqalarimiz albatta havaskor tartibda ham bo‘lib o‘tadi, faqat u viloyatlar kesimida o‘tkaziladi. Hozircha «selection» turnirlar faqat professionallar uchun.

Bahodir Bakiyev katta tajribaga ega sportchi. Nega u xuddi Mahmud Muradov singari turnirlar tashkil etish o‘rniga nufuzi pastroq sanalgan O‘zbekistondagi janglarda qatnashyapti?

- Avvalasi O‘zbekistonda jang olib borish azaliy orzuyim bo‘lgan. 2018 yili Toshkentda o‘tkazilgan JFC musobaqasiga kela olmay qolganman - raqibim jangni bekor qilgan. Shundan beri bu yerdagi turnirda qatnashishni o‘ylab kelardim. Buning uchun Mahmudga katta rahmat.

Eslatib o‘tamiz, «Muradov Professional League» kompaniyasi shu yilning boshida ochilgan bo‘lib, undan ko‘zlangan maqsad aralash jang san’ati turlarini yurtimiz bo‘ylab ommalashtirish hisoblanadi. Loyiha egasi chet elda faoliyat yuritayotgan bir qancha o‘zbek sportchilarini yurtimizga jalb etib, yoshlar bilan tajriba almashishlarini mo‘ljallagan. Joriy musobaqa ham asosan shunga yo‘naltiriladi.

Ma’lumot uchun, 21 oktyabr kuni vazn o‘lchash va Face to Face marosimlari bo‘lib o‘tsa, 22 oktyabrdan musobaqaga start beriladi.

Yusufbek Saydaliyev tayyorladi