Superliganing 23-turidan o‘rin olgan bahsda “Paxtakor” tarkibida zaxiradan maydonga tushgan Muhammadali O‘rinboyev (16 yosh 183 kun) joriy mavsumda elitada to‘p tepgan eng yosh futbolchi bo‘ldi.
Shu o‘rinda Muhammadali “Navbahor” tarkibida to‘p tepayotgan Zabihillo O‘rinboyevning ukasi ekanligini muxlislarga bildirish maqsadga muvofiq.
O‘zbekiston milliy chempionatlari tarixiga nazar solsak, elitada eng yosh maydonga tushgan futbolchi hozirgi kunga qadar Shavkat Salomov (15 yosh 152 kun) bo‘lib turibdi. U 2001 yil “Buxoro” tarkibida debyut qilgan mavsumda bunga erishgan bo‘lib, oliy ligada maydonga tushgan eng yosh futbolchilar orasida debyut mavsumda eng ko‘p (18) o‘yin o‘tkazgan ham hisoblanadi.
Salomovning rekordi bunchalik uzoq davom etishiga 2010 yildan boshlab musobaqalarni o‘tkazish reglamentida elitada maydonga tushadigan futbolchilar 16 yoshga to‘lgan bo‘lishi bo‘yicha band kiritilganligini ta’kidlash joiz.
