Boks bo‘yicha 54 kg. vazn toifasida Serbiyada jahon chempionatiga tashrif buyurgan Shahobiddin Zoirov qur’aga ko‘ra ilk bosqichda mezbon sportchisiga qarshi ro‘baro‘ kelgandi. Asli rossiyalik bo‘lgan Tamir Galanov 2017 yilgi JCHda bronza medalini qo‘lga kiritgan. U yaqinda Serbiya fuqoligini qabul qildi.

Shahobiddin bo‘y va qo‘llarining uzunligi borasida raqibidan ustun edi. Buni his qilgan Galanov ilk bo‘limdanoq masofadan tezda qisqartirishga va zarbalar berishga harakat qildi. Raundning ikkinchi yarmidan boshlab hamyurtimiz raqib uslubini o‘rganib oldi va ustunlikka erisha boshladi. Natijada hakamlarning uch nafari bo‘limni Zoirov foydasiga hal etgan bo‘lsa, ikki referi Tamirga ustunlik berdi.

Shahobiddin ikkinchi va uchinchi raundlarda to‘la ustunlikka erishdi va raqibning o‘ziga yaqinlashishiga yo‘l qo‘ymadi. O‘zi esa ritmni ushlab olgan holda ko‘plab zarbalar berdi. Yakuniy baholar — 5:0 (30:27, 30:27, 30:27, 29:28, 29:28).

Zoirov keyingi bosqichga yo‘l oldi.