Бокс бўйича 54 кг. вазн тоифасида Сербияда жаҳон чемпионатига ташриф буюрган Шаҳобиддин Зоиров қуръага кўра илк босқичда мезбон спортчисига қарши рўбарў келганди. Асли россиялик бўлган Тамир Галанов 2017 йилги ЖЧда бронза медалини қўлга киритган. У яқинда Сербия фуқолигини қабул қилди.

Шаҳобиддин бўй ва қўлларининг узунлиги борасида рақибидан устун эди. Буни ҳис қилган Галанов илк бўлимданоқ масофадан тезда қисқартиришга ва зарбалар беришга ҳаракат қилди. Раунднинг иккинчи ярмидан бошлаб ҳамюртимиз рақиб услубини ўрганиб олди ва устунликка эриша бошлади. Натижада ҳакамларнинг уч нафари бўлимни Зоиров фойдасига ҳал этган бўлса, икки рефери Тамирга устунлик берди.

Шаҳобиддин иккинчи ва учинчи раундларда тўла устунликка эришди ва рақибнинг ўзига яқинлашишига йўл қўймади. Ўзи эса ритмни ушлаб олган ҳолда кўплаб зарбалар берди. Якуний баҳолар — 5:0 (30:27, 30:27, 30:27, 29:28, 29:28).

Зоиров кейинги босқичга йўл олди.